काठमाडौँ । ‘के घर के डेरा : घर नं २’ शुक्रबारबाट प्रदर्शनमा आउन लागेको फिल्म हो । फिल्मको अग्रिम बुकिङ खुला भएको छ । बुकिङमा फिल्मले उच्च शो पाएको छ ।
फिल्मले देशकै ठुलो मल्टिप्लेक्स चेन क्यूएफएक्सले काठमाडौँमा २५ शो र काठमाडौँ उपत्यका बाहिर २२ शो पाएको छ । क्यूएफएक्सका आउटलेटमा भने ४७ शो पाएको छ ।
आइएनआईले आफ्ना चारवटा आउटलेटमा १५ शो दिएको छ । वान सिनेमाजले कालीमाटीको आउटलेटमा चार शो दिएको छ । एफक्यूबले ४ शो उपलब्ध गराएको छ । यो बुकिङको आधारमा घटबढ हुन सक्छ ।
फिल्मका वितरक करण श्रेष्ठले केही हलहरूले अझै शो खोल्ने बाँकी रहेको जानकारी दिए । उनका अनुसार बिहिबार बिहानसम्ममा देशभरका हलहरूको शो राख्नेछन् ।
दीपेन्द्र के खनाल निर्देशित फिल्म ‘के घर के डेरा : घर नं २’ले राम्रो हाइप बनाएको कारण व्यापार राम्रो गर्ने निर्माणपक्षको विश्वास छ ।
खगेन्द्र लामिछानेसँगै निश्चल बस्नेत, उपासना सिंह ठकुरी, आर्यन सिग्देल, केकी अधिकारी, प्रकाश घिमिरे, श्रृजना नापित, संजोग रसाइली, रुविना घिमिरे, सुरज विष्टलगायत कलाकारलगायतको अभिनय रहेको फिल्मको कथा साहित्यकार बुद्धिसागरले लेखेका हुन् ।
एप्पल इन्टरटेन्मेन्ट, ए प्लस इन्टरटेन्मेन्ट तथा नटराज क्रिएसनको प्रस्तुतिमा निर्माण भएको फिल्मको कार्यकारी निर्माता युवराज कार्की र निर्माता नकिमउद्दिन, शरद श्रेष्ठ र किरण महर्जन रहेका छन् ।
फिल्मले घर र डेराको कथा भन्छ । घर नहुनेहरूले घर बनाउन देख्ने सपना र घर हुनेहरूको दुःख फिल्मले उठाएको छ । फिल्मको आज बुधबार साँझ काठमाडौमा प्रिमियर हुँदैछ । जसमा राजनीतिक नेता, समाजसेवी, फिल्मकर्मी र रंगपत्रकारले फिल्म हेर्नेछन् ।
