काठमाडौं । प्रधानमन्त्री केपी शर्मा ओली सहभागी भएको ‘युनाइटेड नेशन्स इन्टरनेशनल कन्फरेन्स अन फाइनान्सिङ फर डेभलपमेन्ट’ कार्यक्रममा सहभागी हुन स्पेन गएका १० जना नेपाली स्वदेश नफर्किएको खुलासा भएको छ ।
असार १४ गते स्पेनको सेभिया शहरमा आयोजित उक्त कार्यक्रममा प्रधानमन्त्री ओलीको टोलीसँगै गएका ती १० जनाको पासपोर्ट स्पेनी अध्यागमनले फेला पारेको हो। तीमध्ये केही स्पेनमै बसेका छन् भने केही अन्य युरोपेली देशतर्फ गएको प्रारम्भिक जानकारी छ ।
फरार भएकाहरूको नामावली: फुर्वा र जीवन (तेह्रथुम),राजेश (काभ्रे),एटराज र प्रणियता (झापा),डण्डु (ताप्लेजुङ),अर्जुन (चितवन),रबिन (म्याग्दी),हरिप्रसाद (पर्वत),शिक्षा (ताप्लेजुङ) — जर्मनीको ह्याम्बर्ग पुगेको पुष्टि l
शिक्षाले आफ्नो फेसबुकमार्फत जर्मनी पुगेको अपडेट गरेकी छिन् । उनी झापामा बुटिक व्यवसायमा संलग्न थिइन्। कार्यक्रममा सहभागी प्रधानमन्त्री ओलीसहितको सरकारी टोली फर्किएपछि संसदमा यो विषय प्रवेश गर्यो। राष्ट्रिय स्वतन्त्र पार्टीकी सांसद सोविता गौतमले प्रतिनिधि सभामा प्रश्न उठाएपछि सत्ता र प्रतिपक्षबीच आरोप-प्रत्यारोप चलेको थियो । एमालेका सांसद महेश बर्तौलाले सबै फर्किएको दाबी गर्दै प्रतिवाद गरे ।
परराष्ट्र मन्त्रालयले समेत सबै व्यक्ति फर्किएको भनाइ सार्वजनिक गरेको थियो । मानव तस्करीको आशंका र नक्कली कागजातको प्रयोग स्पेनस्थित युएन सम्मेलनको नाममा गैरसरकारी संस्थाहरूको संलग्नतामा संगठित गिरोहमार्फत मानव तस्करीको प्रयास भएको पुष्टि हुन थालेको छ । दिल्लीस्थित स्पेनको दूतावासका अनुसार, कतिपय नेपालीले नक्कली सिफारिसपत्र र पुष्टि नभएका कागजातसहित भिसा आवेदन दिएका थिए ।
अधिकांशले सम्मेलनबारे स्पष्ट जवाफ दिन नसकेको दूतावासले जनाएको छ। यसै क्रममा असार १४ गते राति ५५ जना नेपालीको भिसा अन्तिम समयमा रद्द गरिएको थियो भने ९ जनाको अर्को समूह कतार एयरवेजमार्फत प्रस्थान गर्न खोज्दा दिल्ली विमानस्थलमै रोकिएको थियो ।
स्पेनको कार्यक्रममा सहभागीका नाममा विदेशी भूमिमा पुगेर फर्किन नचाहने नेपालीहरूको घटना गम्भीर छ । यसले सरकारी भ्रमणको आवरणमा भइरहेको मानव तस्करीको संकेत दिएको छ । अब यस्ता घटनामाथि छानबिन र कडा कानुनी कारबाही आवश्यक देखिएको छ ।
