काठमाडौं । गायिका देविका बन्दनाको नयाँ म्युजिक भिडियो ‘सोलुको मैच्याङ’ आज विशेष समारोहबीच सार्वजनिक गरिएको छ। राजधानीमा आयोजित कार्यक्रममा वरिष्ठ कलाकार मदनकृष्ण श्रेष्ठ, संगीतकार राजु सिंह, थुलुङ दूधकोसी गाउँपालिकाका अध्यक्ष असिम राईलगायतको उपस्थिति थियो ।
गायिका बन्दनाले सोलुखुम्बुको पर्यटन र सांस्कृतिक समृद्धिमा टेवा पुर्याउने उद्देश्यले गीत सृजना गरिएको बताइन्। चीन भ्रमणका क्रममा सोलुखुम्बुका जनप्रतिनिधिहरूसँगको साक्षात्कारले आफूलाई प्रेरणा दिएको उनले स्पष्ट पारिन् ।
प्रमुख अतिथि असिम राईले गीतमा सोलुखुम्बुको झल्को स्पष्ट देखिएको भन्दै गायिकाप्रति आभार व्यक्त गरे। उनले गीत पुनः छायांकन गर्नुपर्ने खण्डमा गाउँपालिकाले आवश्यक खर्च बेहोर्ने प्रतिबद्धता जनाए ।
वरिष्ठ कलाकार मदनकृष्ण श्रेष्ठले क्यान्सरलाई जितेर फेरि कलाकारितामा फर्किएकी देविका बन्दनालाई प्रशंसा गर्दै गीतको सफलताको शुभकामना दिए ।
गीतमा शब्द रचना देविकाकै हो भने संगीत तथा एरेञ्ज किरण कँडेलको रहेको छ। कमल राई निर्देशित म्युजिक भिडियोमा सत्यकला लामा, फुर्बा ग्याल्बो मोक्तान ‘थुप्तेन’ र विशाल गुरुङले मोडलिङ गरेका छन् ।
कार्यक्रममा गायिकाले भिडियो छायांकन गरिएको कदम्पा गुम्बाका प्रतिनिधिलाई आर्थिक सहयोग पनि प्रदान गरिन्। गुम्बामा हाल करिब ७ सय बालबालिका अध्ययनरत छन् ।
देविका बन्दनाले १०० भन्दा बढी चलचित्रका गीतमा स्वर दिइसकेकी छन्। उनका ‘भरे आउँछु सपनीमा’, ‘यस्तै रहेछ यहाँको चलन’, ‘मास्टर साहेब सिकाइदेऊ पिरती’ लगायत गीतहरू अत्यन्त लोकप्रिय छन्।
‘सोलुको मैच्याङ’ म्युजिक भिडियो देविका बन्दना नामक युट्युब च्यानलमा हेर्न सकिन्छ ।
