काठमाडौं । बहुप्रतिक्षित नेपाली चलचित्र ‘जनै हराएको मान्छे : सम्बन्धका धागाहरू’ को नयाँ गीत ‘मसुरीको दाना’ सार्वजनिक गरिएको छ। अञ्जु पन्त र एसडी योगीको सुमधुर स्वर रहेको गीतमा हर्क साउदको शब्द र एसडी योगीको संगीत संयोजन रहेको छ।
सुनिल क्षेत्रीको कोरियोग्राफी रहेको गीतको भिडियोमा चलचित्रका मुख्य कलाकार विजय बराल, केकी अधिकारी, मिरुना मगर, गौरव पहाडी लगायत फिचर छन्। गीतले प्रेममा रहेका जोडीहरूको भावनात्मक कथा चित्रण गर्छ। दुनियालाई मन पर्ने तर व्यक्तिगत जीवनमा अपूरा रहेका प्रेमिल पात्रहरूको यथार्थ बोकेको गीतमा प्रेमी–प्रेमिकाको मन छुने संवाद प्रस्तुत गरिएको छ।
गीतमा प्रयोग गरिएका टिपिकल नेपाली शब्दहरूले भावनात्मक गहिराइ थपेका छन्। प्रेमिकाले प्रेमीका लागि आफू योग्य रहेको कुराबाट गीत सुरु हुन्छ भने प्रेमीको नजरले आफूलाई हुरुक्कै बनाएको अनुभूति व्यक्त गरिएको छ। गीतमार्फत एकले अर्कालाई जीवनभर सँगै रहने चाहना व्यक्त गरेका छन्।
भिडियोमा कोरस कलाकारहरूको प्रभावशाली उपस्थितिसँगै विजय बरालले कोरियोग्राफीमा गरेको मेहनत प्रस्ट देखिन्छ। ‘क्यारेक्टर आर्टिस्ट नाच्न सक्दैनन्’ भन्ने भनाइलाई तोड्दै उनले उत्कृष्ट नृत्य प्रस्तुत गरेका छन्।
हिमाल न्यौपाने निर्देशित यो चलचित्रमा विजय बराल, केकी अधिकारी, मिरुना मगर, गौरव पहाडी, सुशांक मैनाली, भोलाराज सापकोटा, भावना खपांगी मगर लगायतको अभिनय छ। चलचित्रको कथा, पटकथा र संवाद भानुभक्त ढकालले तयार पारेका हुन्।
कमल न्यौपाने र विमल न्यौपानेले पेपरक्लिपको ब्यानरमा निर्माण गरेको चलचित्रको एसोसिएट निर्देशक मनिष राउत हुन्। कार्यकारी निर्मातामा नारायण तिम्सिना, चुडामणि सिवाकोटी, आरके मानन्धर, सिआर बस्नेत, फिलिप डिसी र जेम्स महाराजन छन् ।
चलचित्रमा शाहिल खानको टिजर–ट्रेलर निर्माण, भरत रेग्मीको सम्पादन, सुप्रिम पराजुलीको कलर, चुल्ठे काजीको एक्सन निर्देशन तथा लक्ष्मणराज पौडेल निर्माण नियन्त्रकका रूपमा रहेका छन् ।
‘पूर्णबहादुरको सारङ्गी’ जस्तो सफल फिल्मपछि विजय बरालको मुख्य भूमिकामा रहेको *‘जनै हराएको मान्छे’*लाई दर्शकहरूले यस वर्षको एक बहुप्रतिक्षित चलचित्रका रूपमा हेरिरहेका छन् । चलचित्रको वितरण जिम्मा गोविन्द शाहीको काफिया फिल्मसले लिएको छ ।
