पोखरा । नेकपा एमाले गण्डकी प्रदेश कमिटीले ‘लिचि बगैंचा’ घुस प्रकरणमा संलग्न रहेको अडिओ सार्वजनिक भएपछि बिचौलियाको भूमिकामा रहेका सुजन लामालाई पार्टीबाट निलम्बन गर्ने निर्णय गरेको छ । शनिबार र आइतबार बसेको प्रदेश कमिटीको बैठकले लामासँगै मुद्दा खेपिरहेका प्रदेश विभाग सदस्य के. गिरीलाई पनि निलम्बन गरेको हो ।
प्रदेश कमिटी सचिव धनन्जय दवाडीका अनुसार, तत्कालीन संघीय मामिला तथा सामान्य प्रशासन मन्त्री राजकुमार गुप्तासँग बार्गेनिङ गरिरहेको अडिओ सार्वजनिक भएपछि लामा विवादमा मुछिएका थिए । उक्त घटनापछि गुप्ताले मन्त्री पदबाट राजीनामा दिएका थिए ।
प्रदेश कमिटीका सल्लाहकार परिषद् सदस्य रहेका लामासँग पहिले स्पष्टिकरण मागिएको थियो, तर स्पष्टीकरण चित्तबुझ्दो नलागेपछि उनलाई सफाइ नपाउँदासम्मका लागि निलम्बन गरिएको दवाडीले बताए । घुस प्रकरणले गम्भीर रूप लिन थालेपछि पार्टीले आन्तरिक अनुशासनका आधारमा कारबाही अघि बढाएको जनाएको छ ।
