काठमाण्डौ – आज काठमाण्डौको कीर्तिपुर र चन्द्रागिरि आसपास क्षेत्रमा मनाइने सात गाउँले जात्राको मुख्य दिन विष्णुदेवी क्षेत्रमा धुमधामका साथ खटजात्रा गरी मनाइँदैछ । कीर्तिपुर क्षेत्रका नेवार समुदायमा मंसिर महिनाको थिंलाथ्व अष्टमी, नवमी र दशमी गरी तीन दिनसम्म जात्रा मनाउने चलन छ ।

हिजो नवमीको दिनमा कीर्तिपुरको पाँगामा विष्णुदेवी रथ जात्रा मनाइएको थियो भने आज दशमीका दिन कीर्तिपुरमा इन्द्रायणी जात्रा गर्ने चलन छ । बोसीगाउँ, सतुंगल, पुरानो नैकाप, लोहँकोट, नयाँ नैकाप र तीनथानालगायतका बासिन्दाले तीनथानामा रहेको विष्णुदेवीलाई आज भात चढाउने चलन छ ।

बिहानैदेखि नैकाप, सतुङ्गल र तीनथानाको सीमामा रहेको विष्णुदेवी पीठमा आज सातैगाउँको प्रतिकका रुपमा खट तथा घ्याम्पो प्रर्दशन गरी जात्रा मनाइने भएकाले भक्तजनको घुँइचो लाग्ने गर्छ ।

आजै देव–देवीको पूजा गरेर सात गाउँबाट ल्याएको खटलाई मन्दिर परिसरमा घुमाई आ–आफ्नो टोलमा फर्काउने परम्परा छ । यो जात्राको विशेषता जाडो मौसममा जात्रा हुने भएकोले तःखाः अर्थात् (थलथले मासु) लगायतका परिकार राखेर भोज खुवाउने परम्परा छ ।