काठमाडौं । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले नागरिकको एकीकृत व्यक्तिगत विवरण व्यवस्थित नभएसम्म भ्रष्टाचार नियन्त्रण गर्न कठिनाई हुने बताएका छन् । उनले भ्रष्टाचारजन्य कसुरको अनुसन्धानलाई प्रभावकारी बनाउन राष्ट्रसेवक र नागरिकको व्यक्तिगत विवरण व्यवस्थित गर्नुपर्ने बताए ।
आयोगको ३५औँ स्थापना दिवसका अवसरमा मंगलबार आयोजित समारोहमा बोल्दै प्रमुख आयुक्त राईले राष्ट्रिय परिचयपत्रमा नागरिकको व्यक्तिगत विवरणसँगै सम्पत्ति विवरण पनि राख्ने व्यवस्था शीघ्र मिलाउनुपर्ने बताए । “राष्ट्रिय परिचयपत्रमा नागरिकको व्यक्तिगत विवरणका साथै सम्पत्ति विवरण पनि राख्ने व्यवस्था शीघ्र मिलाउन आवश्यक छ,” उनले भने ।
आयोगमा प्राप्त हुने उजुरीमध्ये ५० प्रतिशतभन्दा बढी हिस्सा स्थानीय र प्रदेश तहसँग सम्बन्धित रहेको जानकारी दिँदै राईले संघीयता संस्थागत हुन नसक्दा भ्रष्टाचार बढिरहेको बताए । अख्तियारले अनुसन्धान गर्दा विकासको बाधक भन्ने भाष्य पारिएको दुखेसो पनि राईले कार्यक्रममा पोखे ।
समाजमा भ्रष्टाचारप्रति सहिष्णुता बढेकोमा चिन्ता व्यक्त गर्दै युवा पुस्तासँग आफ्ना अभिभावकको सम्पत्तिको स्रोत खोज्न र प्रश्न गर्ने संस्कृतिको विकास गर्नुपर्नेमा उनको जोड थियो ।
सरकारी र सार्वजनिक सम्पत्तिको दोहन रोक्न कडा कदम चाल्नुपर्ने बताउँदै उनले सरकारी जग्गा अतिक्रमण गरी स्वार्थ समूहले निजी प्रयोजनमा प्रयोग गर्ने गरेको प्रसंग पनि उनले सुनाए ।
