बुटवल l पवित्र अक्षय तृतीया को अवसरमा निवृत्त राष्ट्रसेवक समाज, नेपाल अन्तर्गत जिल्ला कार्य समिति रूपन्देहीले सामाजिक सेवामूलक कार्यक्रम आयोजना गर्ने भएको छ । समाजका अनुसार, वैशाख ७ गते सोमबार बिहान ७ बजेदेखि बुटवल-९ कालिकापथस्थित शितलकुञ्जमा सर्वसाधारणका लागि सातु तथा सर्वत वितरण गरिनेछ।
गर्मी मौसमलाई ध्यानमा राख्दै शीतल पेय पदार्थ वितरणमार्फत सेवा, सद्भाव र सहकार्यको सन्देश फैलाउने उद्देश्य रहेको जनाइएको छ । कार्यक्रममा स्थानीय समुदायको उल्लेखनीय सहकार्य रहनेछ । शितलकुञ्ज टोल विकास संस्था, सिर्जना आमा समूह तथा शितलकुञ्ज भजन टोली लगायतका संस्थाहरू सक्रिय रूपमा सहभागी हुनेछन् ।
निवृत्त राष्ट्रसेवक समाजले प्राध्यापक, शिक्षक, निजामती कर्मचारी, नेपाली सेना, प्रहरी, सशस्त्र प्रहरी, राष्ट्रिय अनुसन्धान, न्याय सेवा तथा बैंक तथा वित्तीय संस्थाबाट अवकाश प्राप्त व्यक्तिहरूलाई एकीकृत गर्दै विभिन्न सामाजिक उत्तरदायित्वका कार्यक्रम सञ्चालन गर्दै आएको छ ।
समाजका अध्यक्ष हेम बहादुर पछाइ क्षेत्रीका अनुसार, “सब निवृत्त राष्ट्रसेवक एक हो” भन्ने मूल नारालाई व्यवहारमा उतार्दै सेवा, एकता र मानवीय मूल्य प्रवर्द्धन गर्ने उद्देश्यले कार्यक्रम आयोजना गरिएको हो ।
