काठमाडौं । चलचित्र ‘रोल नं १’ मा समावेश ‘म्याग्दी रुमाले’ गीत यतिबेला सामाजिक सञ्जालमा भाइरल भइरहेको छ। सार्वजनिक भएको केही दिनमै टिकटक, फेसबुक र युट्युबमा यसले निकै सकारात्मक प्रतिक्रिया पाएको छ। प्रशान्त शिवाकोटी र शान्तिश्री परियारको स्वर तथा सुष्मा सिग्देलको शब्द रहेको यो लोकलयमा आधारित गीतमा विनोद न्यौपाने र जुना विश्वकर्माको आकर्षक नृत्य देख्न सकिन्छ। विशेषगरी गण्डकी प्रदेशको लवज र प्रेमिल संवादका कारण दर्शकले यसलाई 'नोस्टाल्जिक' र 'डान्सिङ नम्बर'का रूपमा रुचाएका छन्।
जोन योञ्जनको निर्देशनमा तयार भएको यो चलचित्र जेठ १५ गतेबाट देशभर प्रदर्शनमा आउँदै छ। विद्यार्थीको मनोविज्ञान र वर्तमान शैक्षिक प्रणालीले बालमस्तिष्कमा पार्ने प्रभावको कथा बोकेको यस सिनेमामा मुकुन भुसाल, सुशांक मैनाली, रेणु योगी लगायतका कलाकारको मुख्य भूमिका छ। गीतको सफलताले चलचित्रप्रति दर्शकको उत्साह थप बढाएको छ भने निर्माण टिम हाल देशव्यापी प्रचारप्रसार (मोफसल यात्रा) मा व्यस्त रहेको छ।
