काठमाडाैं । जनै पूर्णिमा (क्वाँटी पूर्णिमा) को अवसरमा परम्परागत ऋतिअनुसार चाङ्गुनारायणको कलशलाई काठमाडौंको हनुमानढोका दरबार परिसरमा ल्याइएको छ ।
भक्तपुरको चाङ्गुबाट पदयात्रा गर्दै ल्याइएका तीनवटा कलशलाई चाङ्गुनारायण, सरस्वती र लक्ष्मीको प्रतिकका रूपमा लिइन्छ । धार्मिक मान्यताअनुसार क्वाँटी भिजाउने प्रयोजनका लागि चाङ्गुनारायण मन्दिर परिसरबाट यो जल ल्याउने प्रचलन छ ।
विशेषगरी नेवार समुदायमा जनै पूर्णिमाको चार दिनअगाडि कलशमा ल्याइएको सोही जल प्रयोग गरी क्वाँटी भिजाएर पर्वको औपचारिक शुरुवात गरिन्छ
। नौ प्रकारका गेडागुडी मिसाएर तयार पारिने पौष्टिक आहार ‘क्वाँटी’ को सेवनले वर्षायाममा खेतीपातीका क्रममा शरीरमा पसेको चिसो फाल्ने र विभिन्न रोगहरूबाट मुक्त भइने जनविश्वास रहेको छ । यसै ऐतिहासिक अवसरमा जीवित देवी कुमारीको यस वर्षको पहिलो वाह्य यात्रा पनि सम्पन्न भएको छ ।
कुमारी घरबाट बाहिर निस्किएर चाङ्गुनारायणको दर्शन गर्नुलाई जीवित देवीको वर्षभरि हुने १३ वटा प्रमुख मात्राहरूमध्येको पहिलो यात्रा मानिन्छ ।
परम्पराअनुसार कुमारीको दोस्रो यात्रा आगामी आईतवार हुनेछ, जसमा उहाँले दिपङ्कर बुद्धको दर्शनका लागि ‘वैद्यद्यः स्वः वनेगु’ विधि पूरा गर्नुहुनेछ । चाङ्गुदेखि हनुमानढोकासम्मको यो कलश यात्रा र कुमारीको दर्शनले काठमाडौं उपत्यकाको जीवन्त सांस्कृतिक र धार्मिक परम्परालाई पुनः उजागर गरेको छ ।
