हेटौँडा । बागमती प्रदेशका मुख्यमन्त्री किरण थापाले संविधानले सुनिश्चित गरेका अधिकार नागरिकको दैनिक जीवनमा प्रत्यक्ष अनुभूत हुने गरी कार्यान्वयन गर्नु तीनवटै तहका सरकारको साझा जिम्मेवारी भएको बताएका छन्।
संविधान दिवसका अवसरमा शुभकामना सन्देश जारी गर्दै मुख्यमन्त्री थापाले संविधानको अक्षर र भावनाअनुसार राज्य सञ्चालन गर्दै नागरिकलाई प्रभावकारी सेवा उपलब्ध गराउनुपर्नेमा जोड दिएका हुन्।
उनले प्रदेश सरकार सुशासन, उत्तरदायी सेवा प्रवाह, सामाजिक न्याय र समावेशी विकासलाई प्राथमिकतामा राखेर समृद्ध बागमती निर्माणको दिशामा अघि बढिरहेको बताए।
संविधानले नागरिकलाई दिएका मौलिक हक तथा अधिकार व्यवहारमा कार्यान्वयन गर्न संघ, प्रदेश र स्थानीय तहबीच प्रभावकारी समन्वय आवश्यक रहेको उनको भनाइ छ।
मुख्यमन्त्री थापाले प्राकृतिक विपद्बाट प्रभावित नागरिकलाई राहत तथा सहयोग उपलब्ध गराउन प्रदेश सरकार निरन्तर क्रियाशील रहेकोसमेत सन्देशमा उल्लेख गरेका छन्।
विपद्को समयमा प्रभावित नागरिकको उद्धार, राहत, पुनर्स्थापना तथा आवश्यक सहयोगलाई प्रभावकारी बनाउन प्रदेश सरकारले सम्बन्धित निकायसँग समन्वय गर्दै आएको उनले बताए।
संविधान दिवसले संविधानका उपलब्धिको समीक्षा गर्दै यसको प्रभावकारी कार्यान्वयनका लागि थप प्रतिबद्ध हुने अवसर प्रदान गर्ने उल्लेख गर्दै मुख्यमन्त्री थापाले समृद्ध, न्यायपूर्ण र समावेशी समाज निर्माणमा सबैको सहकार्य आवश्यक रहेको बताएका छन्।
