जनकपुरधाम । धनुषाको क्षीरेश्वरनाथ नगरपालिका–महेन्द्रनगरस्थित एक गोदाममा जनकपुर भन्सार कार्यालय, सशस्त्र प्रहरी र नेपाल प्रहरीको संयुक्त टोलीले छापा मार्दा ठूलो परिमाणमा शंकास्पद सामग्री बरामद भएको छ। संयुक्त टोलीले गोदाममा छापा मारेर चार ट्रक सामग्री नियन्त्रणमा लिएको जनकपुर भन्सार कार्यालयले जनाएको छ।
प्रारम्भिक अनुसन्धानअनुसार ती सामग्री भारतबाट अवैध रूपमा नेपाल भित्र्याइएको आशंका गरिएको छ।
गोदाममा दुई सयभन्दा बढी बोरा सामग्री रहेको प्रारम्भिक विवरण प्राप्त भएको छ। बरामद सामग्रीमा बैशाखा फर्सीको बीउ, विभिन्न किराना सामग्री तथा पटाकालगायत वस्तु रहेका छन्।
भन्सार कार्यालयका अनुसार बरामद सामग्री शंकर साह नामका व्यापारीसँग सम्बन्धित रहेको प्रारम्भिक रूपमा खुलेको छ। यद्यपि सामग्रीको वास्तविक स्रोत, आयात प्रक्रिया तथा संलग्न व्यक्तिबारे थप अनुसन्धान भइरहेको छ।
जनकपुर भन्सार कार्यालय धनुषाका प्रमुख भन्सार अधिकृत मानबहादुर पौडेलले बरामद सामग्रीको विस्तृत विवरण संकलन भइरहेको जानकारी दिए।
भन्सार, सशस्त्र प्रहरी र नेपाल प्रहरीको संयुक्त कारबाहीपछि बरामद सामग्रीको परिमाण र प्रकृतिबारे थप विवरण अनुसन्धान तथा परीक्षणपछि खुल्ने जनाइएको छ।
