काठमाडौँ । त्रिभुवन विश्वविद्यालय (त्रिवि)ले अध्ययन बिदा लिएर विश्वविद्यालयको नियमअनुसार सेवामा नफर्किएका तथा फर्किएर तोकिएको सेवा अवधि पूरा नगरेका शिक्षक तथा कर्मचारीबाट करिब १६ करोड ५० लाख रुपैयाँ असुलउपर गरेको छ।
त्रिवि रजिष्ट्रारको कार्यालयअन्तर्गत कर्मचारी प्रशासन महाशाखाका अनुसार हालसम्म ७५ वटा अवस्थाबाट उक्त रकम असुल गरिएको हो। अध्ययन बिदाका क्रममा विश्वविद्यालयबाट प्राप्त तलब, भत्ता तथा अन्य सुविधामा नियमानुसार हर्जानासमेत जोडेर रकम असुल गर्ने प्रक्रिया अघि बढाइएको विश्वविद्यालयले जनाएको छ।
विश्वविद्यालयका अनुसार अझै थप अवस्थाको विवरण संकलन, व्यक्तिगत अभिलेख खोजी तथा हिसाबकिताब तयार गर्ने काम भइरहेको छ। हालसम्म हिसाबकिताब तयार भएका थप अवस्थालाई समेत समेट्दा करिब २१ करोड ५० लाख रुपैयाँ असुलउपर गर्नुपर्ने रकम देखिएको छ।
अध्ययन बिदापछि सेवामा नफर्किएका वा तोकिएको सेवा अवधि पूरा नगरेका शिक्षक तथा कर्मचारीका व्यक्तिगत अभिलेख खोजी गरी विश्वविद्यालयलाई बुझाउनुपर्ने रकम निर्धारण गर्ने काम भइरहेको त्रिविले जनाएको छ।
त्रिविले त्यस्ता शिक्षक तथा कर्मचारीलाई आगामी पुस मसान्तभित्र रजिष्ट्रारको कार्यालयमा सम्पर्क गर्न आग्रह गरेको छ। उनीहरूले studyleave@tu.edu.np मार्फत समेत सम्पर्क गर्न सक्ने विश्वविद्यालयले जनाएको छ।
तोकिएको अवधिभित्र सम्पर्कमा नआए विश्वविद्यालयसँग गरिएको कबुलियतनामा तथा प्रचलित विश्वविद्यालय नियमअनुसार कानुनी कारबाही अघि बढाइने त्रिविले स्पष्ट पारेको छ।
यससँगै अध्ययन बिदाको सुविधा लिएर सेवा निरन्तरता नगर्ने शिक्षक तथा कर्मचारीबाट विश्वविद्यालयको स्रोत फिर्ता गराउने प्रक्रिया थप कडाइका साथ अघि बढ्ने देखिएको छ।
