काठमाडौँ । चिकित्सा शिक्षा आयोगको कार्यालय अगाडि आमरण अनसनमा बसेका एमबीबीएस इन्टर्न चिकित्सक डिल्ली हरिजनको स्वास्थ्यमा समस्या आएपछि उपचारका लागि वीर अस्पताल लगिएको छ ।
अनसनको तेस्रो दिन रक्तचाप घट्नुका साथै शरीर कमजोर भएपछि हरिजनलाई उपचारका लागि वीर अस्पताल लगिएको हो । उनी यसअघि पनि आफ्ना माग कार्यान्वयन नभएको भन्दै अनसन बसेका थिए ।
एमबीबीएस तथा बीडीएस इन्टर्न चिकित्सकसँग भएको पाँचबुँदे सहमति कार्यान्वयन नभएको भन्दै हरिजनले चिकित्सा शिक्षा आयोगको प्राङ्गणमा पुनः आमरण अनसन सुरु गरेका हुन् । सहमति भएको दुई महिना बितिसक्दा पनि माग कार्यान्वयन नभएको उनको भनाइ छ ।
हरिजनले आफूले उठाएका माग व्यक्तिगत विषय मात्र नभई हजारौँ एमबीबीएस तथा बीडीएस विद्यार्थी र इन्टर्न चिकित्सकको भविष्यसँग जोडिएको बताएका छन् । सहमति कार्यान्वयन भएमा त्यसको प्रत्यक्ष लाभ आगामी पुस्ताका विद्यार्थी तथा चिकित्सकलाई समेत पुग्ने उनको भनाइ छ ।
इन्टर्न चिकित्सकको मागमा एमबीबीएस, बीडीएसलगायत एकवर्षे इन्टर्नसीपमा स्वास्थ्य सेवाको आठौँ तहको प्रारम्भिक तलबमानको ५० प्रतिशत बराबर निर्वाह भत्ता उपलब्ध गराउने विषयमा छलफल गर्ने सहमति छ ।
त्यस्तै, स्वीकृत शुल्कबाहेक अतिरिक्त शुल्क लिन नपाउने व्यवस्था गर्ने, एमबीबीएस तथा बीडीएस विद्यार्थीका लागि छात्रावासलाई अनिवार्य नभई वैकल्पिक बनाउने र इन्टर्न तथा आवासीय चिकित्सकको कार्यघण्टा श्रम ऐनअनुसार समान बनाउन समिति गठन गर्ने विषय पनि सहमतिमा समेटिएको छ ।
मेडिकल कलेजले लिएको अतिरिक्त शुल्कबारे छानबिन गरी फिर्ता गराउने विषयसमेत पाँचबुँदे सहमतिमा उल्लेख छ ।
तर, सहमति कार्यान्वयनमा ढिलाइ भएको भन्दै हरिजन पुनः आमरण अनसनमा बसेका हुन् । अनसनकै क्रममा स्वास्थ्यमा समस्या देखिएपछि उनलाई वीर अस्पताल लगिएपछि सहमति कार्यान्वयन र इन्टर्न चिकित्सकका मागबारे सम्बन्धित निकायमाथि थप दबाब बढेको छ ।
