कपिलवस्तु। लक्ष्मणघाटमा सामाजिक बिकास केन्द्रको आयोजनामा सदाका बर्षहरुमा जस्तै यसबर्ष पनि यही मंसिर ११ देखी १३ गते सम्म तिन दिने लक्ष्मणघाट पुर्णिमा मेला तथा बृहत साँस्कृतिक कार्यक्रम लक्ष्मणघाटमा हुने भएको छ ।
एकसय बर्ष अगाडीदेखि चल्दै आएको सो मेलामा कपिलवस्तु, अर्घाखाँची, प्युठान,रुपन्देही र छिमेकी मुलुक भारतबाट समेत श्रद्धालु भक्तजनहरु मेलामा आउने गरेको पाइन्छ ।
कार्यक्रमलाई भव्य रुपमा सम्पन्न गर्न संस्थाका अध्यक्ष थानेश्वर अधिकारीको संयोजकत्वमा ५१ सदस्सिय मेला मुल आयोजक समिति गठन गरिएको छ । बैठकले लक्ष्मणघाट सामाजिक विकास केन्द्रका संस्थापक अध्यक्ष रन बहादुर काउचालाई मेलाको निर्देशक तोकेको छ ।
प्रत्येक बर्ष पुर्णिमा मेलाको अवसरमा बिशेष गरी थारु समुदायका मानिसहरुले बाणगंगा नदिमा स्थान गरी गौपुजन गर्ने दान दिने कथा सुन्ने , मुण्डन गरी मनाइने यो धार्मिक पर्व अहिले सबै समुदायका मानिसले मनाउने गरेको पाइन्छ ।
मेलामा बिभिन्न स्थानिय व्यापार व्यवसायलाई प्रवद्र्धन गर्न बिभिन्न व्यवसायिक, कृषि , खाद्यान्न तथा घरेलु उत्पादनका स्टलहरु राखिने भएको छ । यस बर्ष देखी सो मेलामा पिङ,मोतका कुवा,झुला, मिक्की माउस र वाल उद्यान समेत राखिएकाले दर्शकहरुको उपस्थिती बढ्ने सामाजिक अगुवा मिना आले काउचाले बताउनुभयो ।
कार्यक्रममा स्थानिय तथा राष्ट्रिय कलाकारको प्रस्तुती रहने छ । तिन दिनसम्म सञ्चालन हुने सो मेलामा करिव २१ हजार दर्शकले अवलोकन गर्ने अनुमान गरिएको छ।
मेलाको सह–आयोजकमा लक्ष्मणघाट बोलबमधाम विकास समिति रहेको छ ।
