काठमाडौँ । फिल्म ‘पूजार सार्की’ निर्माण हुने भएको छ । निर्देशक दिनेश राउतले आफ्नो ७ औँ प्रोजेक्टको रूपमा यो फिल्म घोषणा गरेका हुन् । सामाजिक कथामा निर्माण हुन लागेको फिल्मका निर्माता सुभाष भुसाल हुन् । फिल्मको डिजिटल पार्टनरको रूपमा ओएसआर डिजिटल रहेको छ ।
विकास सुवेदीको लेखन रहेको फिल्म किङ्गडम नेटवर्कको ब्यानरमा निर्माण हुन लागेको हो । माघको पहिलो साताबाट छायाङ्कनमा जाने फिल्म पोखर र बेनीमा छायाङ्कन हुनेछ । आरआर फिल्मको वितरण रहने फिल्मका लागि अहिले धमाधम कलाकार छनौट भइरहेको छ ।
फिल्मको कथाअनुसार कलाकार छनौट भइरहेको निर्देशन दिनेश राउतले बताए । ‘हामीले कथा अनुसार चरित्रमा न्याय गर्ने कलाकार छनौटमा छौ । त्यसैले नयाँ पुराना जो पनि हुनसक्छ’ राउतले थपे ।
सानोमा आफ्नो बुबाबाट सुनेको कथा अहिले सबैलाई भन्नुपर्छ भन्ने लागेर फिल्मको रूप दिएको लेखक सुवेदीले बताए । सुवेदी भन्छन्, ‘फिल्मको कथा एकदमै राम्रो छ । मलाई लाग्छ यस्तो कथामा अहिलेसम्म फिल्म बनेकै छैन ।’ निर्देशक राउतले यस अगाडि फिल्म ‘प्रकाश’ बनाएका थिए । समीक्षक तथा दर्शक दुवैले रुचाएको ‘प्रकाश’ले विभिन्न अवार्ड समेत प्राप्त गरेको छ ।
