काठमाडौंँ । आगामी शुक्रबारबाट सार्वजनिक प्रदर्शनमा आउने फिल्म शो ‘दयारानी’ । दयाहाङ राई र दीया पुनको मुख्य भूमिका रहेको फिल्मको अग्रिम टिकट बुकिङ खुल्ला भएको छ । फिल्मले अग्रिम टिकट बुकिङमा देशभरबाट ११३ शो पाएको छ ।
फिल्मलाई देशकै ठुलो मल्टिप्लेक्स चेन क्युएफएक्सले राजधानी र मोफसलमा गरी ३६ शो उपलब्ध गराएको छ ।
यस्तै बिग मुभिजले ६ शो दिएको छ, भने वान सिनेमाजले ९ शो दिँदा एफक्युब सिनेमाजले ४, आइएनआइले १२ शो दिएका छन् । त्यसैगरी रञ्जना, सिके बिएसआर, सिडिसी र क्युज सिनेमाले पनि यस्तै अनुपातमा शोहरु छुट्याएका छन् ।
फिल्म नेपालमा मात्र नभई अमेरिका, अष्ट्रेलियामापनि एकसाथ रिलिज हुनेछ । फिल्मको ओभरसिज वितरण खरिदसेभेन सिज इन्टरटेनमेन्टले लिएको हो । फिल्मको अमेरिकाका २३ थिएटरमा सिनेमाको १ सय ९७ शो पक्का भएका छन् ।
सिनेमा डलास, न्युयोर्क, ओहायो, क्यालिफोर्निया, सिकागो लगायत अमेरिकाका प्रमुख सहरमा हेर्न पाइनेछ । त्यसैगरी अष्ट्रेलियामा आगामी हप्ताका लागि १ सय ८० वटा शो निश्चित भएको छ ।
सेभेन सीज इन्टरटेनमेन्टका अनुसार ‘दयारानी’ मध्यपूर्वमा फेब्रुअरी १५ मा रिलिज हुनेछ भने बेलायतसहितका युरोपेली मुलुकहरुमा फेब्रुअरी १६ बाट रिलिज हुनेछ।
बाँसुरी फिल्मस् र माओत्से फिल्मस्को ब्यानरमा निर्माण भएको फिल्मलाई कलाकार माहोत्से गुरुङले निर्देशन गरेका हुन् ।गुरुङको यो निर्देशनमा डेब्यु फिल्म हो ।
फिल्ममा दयाहाङ र दीयाका अलावा विजय बराल, प्रमिसा गुरुङ, पुस्कर गुरुङ, टिकाराम घले, शिरिषा कुँवर, नयन गुरुङ, सुर्य सुनार, राजेन्द्र थापा, सीतादेवी गुरुङ र क्रिष्टी गुरुङ लगायत कलाकारको अभिनय छ ।
मोहन गुरुङ, किरण गुरुङ, केन्द्र लिम्बु र न्यू आइटी भेन्चरको सहकार्यमा निर्माण भएको फिल्मका कार्यकारी निर्माता रामबाबु गुरुङ र अपिल विष्ट हुन् ।
