काठमाडौं । शिक्षा, विज्ञान तथा प्रविधि मन्त्री विद्या भट्टराईले त्रिभुवन विश्वविद्यालयले आगामी वर्षदेखि वार्षिक परीक्षा प्रणालीअनुसार सबै सङ्कायहरूको स्नातक तहका प्रश्नपत्रहरू तयार गर्दा अंग्रेजी र नेपाली दुवै भाषामा सोधिने निर्णय गरेको जानकारी दिएकी छन् ।
उनले सामाजिक सञ्जालबाट उक्त निर्णयको जानकारी दिएकी हुन् । उनले उक्त व्यवस्थाअनुसार आगामी प्रथम वर्षको परीक्षादेखि अनिवार्य रूपमा लागु गरी क्रमशः दोस्रो, तेस्रो र चौथो वर्षमा समेत लागु गर्ने निर्णय गरेको बताइन् ।
‘हाललाई शिक्षा शास्त्र सङ्काय, मानविकी सङ्काय, व्यवस्थापन सङ्काय र कानुन सङ्कायको स्नातक तहको परीक्षामा नेपाली र अंग्रेजी दुवै भाषामा प्रश्नपत्र तयार गरिनेछ’,उनले भनिन् ।
प्रश्नपत्र नबुझिएकै कारण धेरै विद्यार्थीहरू फेल भएको भन्दै अंग्रेजी र नेपाली दुवै भाषामा प्रश्नपत्र निर्माण गर्नुपर्ने माग उठ्दै आएको थियो ।
