काठमाडौँ । शिक्षा, विज्ञान तथा प्रविधि मन्त्रालयले जनक शिक्षा सामग्री केन्द्र लिमिटेडको प्रबन्ध सञ्चालक पदका लागि दरखास्त आह्वान गरेको छ । खुला प्रतिस्पर्धात्मक प्रतियोगितामार्फत पदपूर्ति गर्ने उद्देश्यले मन्त्रालयले दरखास्त आह्वान गरेको हो ।
त्यसका लागि प्रबन्ध सञ्चालकको छनौट तथा सिफारिस सम्बन्धी कार्यविधि, २०८१ जारी गरेको छ । उक्त कार्यविधिमा तोकिएको मापदण्ड अनुसार इच्छुक व्यक्तिहरूलाई सात दिनभित्रमा आवेदन दिन आह्वान गरेको हो ।
लिमिटेडको कार्य प्रकृतिसँग सम्बन्धित विषय वा शिक्षा, प्रशासन, व्यवस्थापन, अर्थशास्त्र, इन्जिनियरिङ वा कानुनमा मान्यता प्राप्त विश्वविद्यालयबाट कम्तीमा स्नातकोत्तर तह उत्तीर्ण गरेर कुनै संस्था वा निकायको अधिकृत स्तरको पदमा कम्तीमा १० वर्षको कार्य अनुभव भएको हुनुपर्नेछ ।
आवेदनकर्ताहरूले पाँच हजार शब्दमा नबढ्नेगरी व्यावसायिक कार्ययोजना तयार गरी कार्ययोजनाका कुनै पनि पानामा आफ्नो पहिचान नखुल्नेगरी चार प्रति सिलबन्दी सहितको खाममा पेस गर्नुपर्नेछ ।
आवेदन दिने व्यक्तिहरू कुनै पनि राजनीतिक दलको सदस्य नरहेको स्वयं घोषणा गर्नुपर्नेछ । जनक शिक्षा सामाग्री केन्द्रसँगको ठेक्का वा कुनै चलअचल सम्पत्ति कारोबारमा आफैं वा आफ्नो परिवारका कुनै सदस्यको संलग्नता नभएको वा केन्द्रसँग निजी स्वार्थ नभएको हुनुपर्नेछ ।
त्यस्तै आवेदनकर्ताको नाममा व्यक्तिगत बेरुजु बाँकी नरहेको हुनुपर्नेछ । मन्त्रालयले प्रबन्ध सञ्चालक पदमा नियुक्तिको लागि सिफासिर गर्न एक छनौट समिति बनाएको छ । सञ्चालक समितिका सेवा निवृत्त अध्यक्ष मध्येबाट मन्त्रालयले मनोनित गरेको एक जनाको संयोजत्वमा छनौट समिति हुनेछ । जसको सदस्यमा पाठ्यक्रम विकास केन्द्रका महानिर्देशन हुनेछ भने । मन्त्रालयको कर्मचारी प्रशासन हेर्ने सहसचिव सदस्य सचिव हुनेछन् ।
