बुटवल । बुटवलमा लुम्बिनी प्रादेशिक अस्पतालको भवन निर्माणको काम अहिले धमाधम भइरहेको छ । प्रदेश पूर्वाधार विकास प्राधिकरण मार्फत ६ अर्ब १८ करोड ७५ लाख रूपैयाँको लागतमा भवन निर्माण काम सुरू गरिएको हो ।
लुम्बिनी प्रदेश सरकारले आफ्नो गौरवको आयोजना अन्तर्गत अगाडि बढाइरहेको भवनको शिलान्यास गत भदौ १५ गते गरिएको थियो । प्रदेश पूर्वाधार विकास प्राधिकरणले भारतीय निर्माण कम्पनी क्याप साइट आशिष रेलिग्रेट भेन्चर र नेपाली कम्पनी आशिष रेलिगसनसँग २०८० पुस २६ गते भवन निर्माणका लागि ठेक्का सम्झौता गरेको थियो ।
शिलान्यास गरिएको पाँच महिना अवधिमा १३ प्रतिशत काम पूरा भएको प्रदेश पूर्वाधार विकास प्राधिकरणले जनाएको छ । सम्झौता अनुसार १२ तले बन्ने यो भवन २०८५ पुस मसान्तसम्म बनिसक्नुपर्ने छ । दैनिक २१० जना कामदार काममा खटिएका र २० जना प्राविधिकले कामको अनुगमन गरिरहेको बताइएको छ ।
भवन पाँच हजार आठ सय वर्गमिटर हाराहारी क्षेत्रफलमा बन्नेछ । भवनको सबैभन्दा माथि हेलिप्याड हुनेछ । हेलिप्याडबाट सिधै इमर्जेन्सी आउजाउ गर्न मिल्ने लिफ्ट बन्नेछ ।
भवन निर्माणका लागि प्रदेश सरकारले चालु आर्थिक वर्षमा एक अर्ब ८० करोड रूपैयाँ बजेट विनियोजन गरेको थियो । यसमध्ये निर्माण कम्पनीलाई पेस्कीसहित डेढ अर्ब रूपैयाँ जति भुक्तानी भइसकेको छ । अस्पतालको पुरानो भवन २०१६ सालमा बनेको थियो ।
यसअघि लुम्बिनीका मुख्यमन्त्री शंकर पोख्रेलले २०७६ सालमा सरकारको ड्रिम प्रोजेक्ट रूपमा अस्पताल भवन बनाउने प्रक्रिया अगाडि बढाएका थिए । कुल ६ बिघा १२ कट्ठा जमिनमा सञ्चालित ११४ वर्ष पुरानो अस्पताल, निर्माण पूरा भएपछि देशकै पहिलो अस्पताल हुनेछ । अहिले अस्पतालमा ८५१ जना कार्यरत छन् ।
