काठमाडौँ । नेपालमा चरा प्रजातिको सङ्ख्या ८ सय ९८ पुगेको छ । पछिल्लो पटक बैजनी–बुङ्गेचरा थप भएको हो । यो चरा बङ्गलादेश, भारत, म्यानमार र श्रीलङ्कामा पाइने गरेकोमा नेपालमा पनि भेटिएको हो ।
झापाको मेचीनगर नगरपालिका–६ काँकरभिट्टामा समुद्र सतहदेखि १ सय ३३ मिटर उचाइमा नयाँ प्रजातिको चरा 'पर्पल–रुम्पेड सनवर्ड' अर्थात् बैजनी–बुङ्गेचरा भेटिएको र अभिलेख भएको नेपाल बर्ड रेकर्ड कमिटीले जनाएको छ ।
चराविद् देवेन्द्रकुमार खरेलले चरा अवलोकनका क्रममा फागुन ७ गते मेचीनगर क्षेत्रको आवासीय भवन परिसरमा रहेको एभोकाडो तथा सितलचिनीको रुखमा यो चराको भालेपोथी देखेका थिए ।
खरेलपछि चराविद्हरू अनिश तिमसिना, चक्र तिमसिना र शङ्कर लुइँटेलले पनि अवलोकन गरेका थिए । चराको तस्बीर पाएपछि त्यसको पुष्टि बर्ड रेकर्ड कमिटीले गरेको अध्यक्ष डा.तुल्सी सुवेदीले जानकारी दिए ।
यसैबीच नेपालबाट लोप भएको ठानिएको खैरो झाडी फिस्टो चरा चितवनमा देखिएको छ । चराविद् प्रताप गुरुङले गएको मङ्सिर २३ गते भरतपुर महानगरपालिका–२६ दिव्यनगरको खेतमा खैरो झाडी फिस्टो चरा देखेका थिए ।
गुरुङले खिचेको यो चराको तस्वीर पुस ८ गते नेपाल बर्ड रेकर्ड कमिटीमा पठाएका थिए । चराको तस्वीर र अन्य विवरणका आधारमा चरा खैरो झाडी फिस्टो भएको कमिटीले पुष्टि गरेको नेपाल बर्ड रेकर्ड कमिटीका डा.तुल्सी सुवेदीले जानकारी दिए ।
खैरो झाडी फिस्टो चरा
नेपालमा १९औं शताब्दीयता यो चराको कुनै अभिलेख नभएको हुँदा लोप भएको ठानिएको डा.सुवेदीले बताए । अङ्ग्रेजी नाम 'ब्राउन बुस वार्ब्लर' रहेको यो चरा भुटान, भारत, चीन, म्यानमार र थाइल्यान्डमा पाइने नेपाल पक्षीविद् सङ्घले जनाएको छ । यो अब नेपालमा पनि पाइने सूचीमा समावेश भएको छ ।
