काठमाडौं । विद्यालय शिक्षा विधेयकप्रति असन्तुष्टि जनाउदै नेपाल शिक्षक महासंघले सोमबारबाट पुनः आन्दोलनसुरु गरेको ।
सरकारले आफुहरुसंग गरेको सहमति पूर्णरुपमा सम्बोधन हुन नसकेको भन्दै महासंघले पुन आन्दोलनसुरु गरेको हो ।महासंघले सोमबार प्रधानमन्त्री कार्यालयमा ध्यानाकर्षण पत्र दर्ता गर्नुका साथै शिक्षामन्त्री प्रमुख राजनीतिक दललाई ध्यानार्षण पत्र बुझाएको छ ।
महासंघको ध्यानार्षण पत्र बुझ्दै एमाले प्रमुख सचेतक महेश बर्तौलाले महासंघले उठाएका बिषयहरुप्रति एमाले संसदीय दलको ध्यानाकर्षण भएको भन्दै सरोकारवाला निकायसंग छलफल गर्ने प्रतिवद्धता जनाउनुभयो । उहाँले विधेयक तयार पार्न अधिकतम प्रयास गरेकाले राम्रा कुरालाई स्वागत गर्न आग्रह गर्नुभयो । महासंघले उठाएका बिषयलाई मिलाउने ठाँउ रहेको उहाँको भनाइ छ ।
विधेयकमा उल्लेख धेरै बिषय सकारात्मक रहे पनि शिक्षक कर्मचारीका मुख्य सरोकार र विगतका सहमतिमा रहेका धेरै बिषयहरु अझै पनि सम्बोधन हुन नसकेकाले बाध्य भएर आन्दोलन सुरु गर्नुपरेको महासंघका अध्यक्ष लक्ष्मी किशोर सुवेदीले बताउनुभयो। उहाँले भदौ ११ गतेदेखि २० गतेसम्म केन्द्रमा सबै राजनीतिक पार्टीका कार्यालयहरूमा ध्यानाकर्षण पत्र बुझाउदै २ घण्टा प्रतिनिधिमूलक धर्ना दिने जानकारी दिनुभयो ।
अध्यक्ष सुवेदीले अहिले महासंघले नयाँ बिषय उठान नगरेको र यसअघि भएको सहमतिको कार्यान्वयन हुनुपर्ने माग रहेको स्पष्ट पार्नुभयो ।
