बुटवल । अन्नपूर्ण माध्यमिक विद्यालय र बुटवल उप–महानगरपालिका वार्ड नं ६ को संयुक्त आयोजनामा शुक्रबार विद्यालय परिसरमा एक दिवसीय निःशुल्क आँखा शिविर सम्पन्न भएको छ ।
कार्यक्रमको उद्घाटन बुटवल उप–महानगरपालिका वार्ड नं ६ का अध्यक्ष श्री लोकनाथ न्यौपानेले ९४ वर्षीय जेष्ठ नागरिक चिरञ्जीवी पौडेललाई बिरामी पुर्जा हस्तान्तरण गर्दै गर्नुभएको थियो ।
शिविरमा नेकपा (माओवादी केन्द्र) का नगर उपाध्यक्ष लालबहादुर थापा, वार्ड सदस्य बीमा कुमारी थापा र समाजसेवी हरी थापाले विद्यालय परिवारको सक्रियता र समाजसेवाप्रतिको प्रतिबद्धताको प्रशंसा गर्दै यस्ता सामाजिक कार्यले समुदायमा सकारात्मक प्रभाव पार्ने उल्लेख गर्नुभयो ।
लायन्स आँखा अस्पतालको प्राविधिक सहयोगमा सम्पन्न शिविरमा २३४ जनाले आँखा परीक्षण गराएका थिए, जस मध्ये ११ जनालाई निःशुल्क मोतिबिन्दु शल्यक्रियाका लागि सिफारिस गरिएको विद्यालयले जनाएको छ ।
विद्यालयका प्रिन्सिपल मित्रमणि आचार्यले कार्यक्रम सफल बनाउन सहयोग गर्ने सबैप्रति हार्दिक धन्यवाद व्यक्त गर्दै आगामी दिनमा पनि यस्ता जनसेवामूलक कार्यक्रम निरन्तर सञ्चालन गर्ने प्रतिबद्धता जनाउनुभयो ।
