काठमाण्डाै – शेयर बजार आज सामान्य घटेको छ । हिजो र अस्ति दोहोरो अङ्कले घटेको शेयर बजार परिसूचक नेप्से आज २ दशमलव ९५ अङ्कले ओरालो लागेर २ हजार ८०४ दशमलव १७ विन्दुमा झरेको छ ।
आज बैंक, फाइनान्स, लगानी, उत्पादन तथा प्रशोधन र निर्जीवन बीमा बाहेक सबै समूहको सूचक घटेकोमा होटल तथा पर्यटन समूहको सूचक सबैभन्दा धेरै २ दशमलव ३६ प्रतिशतले ओरालो लागेको छ ।
आज १३८ वटा कम्पनीको शेयर घटेकोमा १२१ वटाको बढेको छ । यस्तै १० वटा कम्पनीको शेयर घटबढ भएको छैन ।
आज होटल फरेस्ट इनको शेयर सबैभन्दा धेरै १० दशमलव ७५ प्रतिशतले ओरालो लागेको छ । बजार सामान्य घटेको दिन पाल्पा सिमेन्ट, सूर्यकुण्ड हाइड्रो इलेक्ट्रिक, शिखर पावर डेभलपमेन्टको शेयर १५ प्रतिशतले बढेको छ ।
आज नेप्से घटे पनि कारोबार रकम भने बढेको छ । हिजो ५ अर्ब ७७ करोडको कारोबार भएकोमा आज ३४२ वटा कम्पनीका १ करोड ७५ लाख कित्ता शेयर ७ अर्ब ८१ करोड रुपैयाँमा किनबेच भएको छ ।
