काठमाडौँ । भदौ १० गतेको विनाशकारी बाढी र त्यसबाट उत्पन्न सङ्कटको सामना गर्न राष्ट्रिय स्वतन्त्र पार्टीका महामन्त्री विपिन आचार्य र अस्मिता पब्लिकेसनका तर्फबाट प्रधानमन्त्री दैवी प्रकोप उद्धार कोषमा ठुलो परिमाणको आर्थिक सहयोग उपलब्ध गराइएको छ ।
मुलुकमा आइलागेको प्राकृतिक विपत्तिका कारण पीडित भएकाहरूको उद्धार, राहत र पुनःस्थापनामा सघाउ पुर्याउने उद्देश्यले १ करोड १ लाख ११ हजार १ सय ११ रुपैयाँ सहयोग कोषमा जम्मा गरिएको हो । महामन्त्री आचार्यका अनुसार यो सहयोग उनको व्यक्तिगत, अस्मिता पब्लिकेसन, काका मनोजकुमार शर्मा र परिवारका तर्फबाट संयुक्त रूपमा प्रदान गरिएको हो ।
विपद्को यो कठिन घडीमा पीडितहरूप्रति ऐक्यबद्धता जनाउँदै महामन्त्री आचार्यले उक्त रकम कोषमा हस्तान्तरण गरेका हुन् । सहयोग रकम हस्तान्तरण गर्दै उनले यस सङ्कटको सामना गरिरहेका सम्पूर्ण नेपालीमा धैर्य र साहस प्राप्त होस् भन्ने कामना गरेका छन् ।
सहयोगपछि महामन्त्री आचार्यले भने, ,यो सङ्कटमा हाम्रो वैयक्तिक, परिवार र संस्थाको तर्फबाट पनि केही योगदान होस् भन्ने हेतुले हामीले यो रकम जम्मा गरेका छौँ । यो दुःख चाँडै टरेर जाओस् । विपद्को सामना गर्न हामी सबैलाई धैर्य र साहस मिलोस् ।'
आर्थिक सहयोगका अतिरिक्त, महामन्त्री आचार्यले एक राजनीतिज्ञका रूपमा समाज र राष्ट्रप्रतिको आफ्नो जिम्मेवारीलाई इमानदारिताका साथ निभाउने प्रतिबद्धता समेत व्यक्त गरेका छन् । 'विपद्को यो घडीमा एक राजनीतिज्ञका रूपमा पूरा गर्नुपर्ने इमानदार कोसिस त सदैव रहि नै रहनेछ,' उनले भने ।
