काठमाडौं । अर्थमन्त्री डा. स्वर्णिम वाग्लेले बन्द तथा समस्याग्रस्त सरकारी उद्योग सञ्चालनको जिम्मेवारी निजी क्षेत्रलाई नै हस्तान्तरण गर्ने सरकारको नीति रहेको स्पष्ट पारेका छन्।
शुक्रबार नेपाल आर्थिक पत्रकार समाज (सेजन) को २८औँ साधारणसभालाई सम्बोधन गर्दै अर्थमन्त्री वाग्लेले सरकारले आफैँ सरकारी उद्योग सञ्चालन गर्न लागेको भन्ने बाहिरको भाष्य गलत भएको बताए। उनका अनुसार सरकारी स्वामित्वमा रहेका उद्योगको सम्पत्ति र दायित्व व्यवस्थापन गरी आवश्यक प्रक्रिया पूरा गरेपछि सञ्चालनको जिम्मेवारी निजी क्षेत्रलाई दिइनेछ।
वाग्लेले गोरखकाली रबर उद्योग, हेटौँडा सिमेन्ट, उदयपुर सिमेन्टलगायत सातवटा सार्वजनिक उद्योगको विस्तृत मूल्यांकन (डीडीए) सम्पन्न भइसकेको जानकारी दिए। मूल्यांकनबाट प्राप्त विवरणका आधारमा सरकारी जग्गा तथा अन्य सम्पत्तिको व्यवस्थापन गरेर उद्योग सञ्चालनमा निजी क्षेत्रका लागि बाटो खुला गरिने उनको भनाइ छ।
उनले सरकारले लामो समयदेखि बन्द तथा समस्याग्रस्त अवस्थामा रहेका उद्योगलाई तत्काल पुनः सञ्चालनको अवस्थामा पुर्याउन आवश्यक प्रारम्भिक काम मात्र गरिरहेको बताए।
‘सरकारले उद्योग नै चलाउन थाल्यो कि भन्ने छ, तर हामीले धुलो टक्टक्याएका मात्र हौँ । यसलाई एउटा निश्चित बिन्दुमा पुर्याएर निजी क्षेत्रलाई नै दिने हो,’ उनले भने।
अर्थमन्त्री वाग्लेले सरकारी उद्योगसम्बन्धी विषयमा अहिले नै हतारमा निष्कर्ष निकाल्ने गरी ‘प्रिम्याच्योर’ भाष्य निर्माण गर्नु उपयुक्त नभएको पनि बताए। सरकारको उद्देश्य उद्योग सञ्चालनमा प्रत्यक्ष संलग्न हुने नभई सम्पत्ति, दायित्व र कानुनी जटिलता व्यवस्थापन गरेर निजी क्षेत्रलाई लगानी तथा सञ्चालनका लागि अनुकूल वातावरण बनाउनु रहेको उनले स्पष्ट पारे।
सरकारी उद्योगको व्यवस्थापनमा लामो समयदेखि देखिँदै आएको वित्तीय भार, सञ्चालनगत कमजोरी र सम्पत्ति उपयोगको समस्यालाई समाधान गर्दै निजी क्षेत्रको दक्षता र लगानीमार्फत उद्योगलाई पुनः सञ्चालनमा ल्याउने सरकारको तयारी देखिन्छ।
