काठमाडौं । इन्जिनियरिङ अध्ययन संस्थानले एकलौटी शुल्क वृद्धि गर्न लागेको भन्दै तीन विद्यार्थी संगठनले आन्दोलन गर्ने चेतावनी दिएका छन् । नेविसंघ, अखिल (क्रान्तिकारी) र समाजवादी विद्यार्थी युनियन नेपालले शुक्रबार ललितपुरमा पत्रकार सम्मेलन गर्दै विद्यार्थीहरुसंग यसअघि भएको सहमति बिपरित इन्जिनियरिङ अध्ययन संस्थानले एकलौटी शुल्क वृद्धि गर्न लागेको भन्दै आन्दोलन गर्ने चेतावनी दिएका हुन् ।
यसअघि करिव ३ लाख रहेको शुल्कलाई बृद्धि गरि ७ लाख ७५ हजार पुराएपछि यसअघि आन्दोलित बिद्यार्थीहरु र प्रशासनबीच तत्काल शुल्क बृद्धि नगर्ने सहमति भएाके थियो । तर शुल्क समायोजन गर्न गठित ११ सदस्यीय समितिले पुन ५ लाख भन्दा बढि शुल्क लिन सिफारिस गरेको भन्दै उनीहरुले आपत्ति जनाएका हुन् ।
पत्रकार सम्मेलनमा नेविसंघ अध्यक्ष दुजाङ शेर्पाले इन्जिनियरिङ अध्ययन संस्थानका कारण ६२/६३ मा पनि नरोकिएको इन्जिनियरिङको परिक्षा रोकिएको आरोप लगाउनुभयो । उहाँले परिक्षालाई सहज रुपमा अघि बढाउन यसअघि बिद्यार्थीहरुले संस्थानसंग सहमति गरेपनि सम्झौताको मसि सुक्न नपाउदै इन्जिनियरिङ अध्ययन संस्थानले पुन शुल्क बृद्धि गर्न खोजेको अरोप लगाउनुभयो ।
त्यस्तै अखिल (क्रान्तिकारी) की अध्यक्ष पञ्चा सिंहले अहिले ५ लाख ५४ हजार शुल्क तोक्ने तयारी भइरहेको भन्दै विद्यार्थीहरुलाई स्वीकार्य नहुने स्पष्ट पार्नुभयो । उहाँले संस्थानको सुधारका लागि आफुहरु प्रतिवद्ध रहेपनि विद्यार्थीहरुलाई मर्कामा पार्ने गरि गर्न लागिएको शुल्कबृद्धि कार्यान्वयन नगर्न सुझाव दिनुभयो ।
संस्थानलाई घाटाको त्रास देखाएर राज्यलाई अर्बौं घाटा हुने गरी प्रवेश परीक्षा धकेल्ने षड्यन्त्र भइरहेको भन्दै उनीहरुले बिद्यार्थी र संस्थानको भविष्यमाथि गम्भीर हुन पनि ध्यानाकर्षण गराएका छन् ।
