काठमाडौँ । स्वास्थ्य तथा जनसङ्ख्या मन्त्रालयका सचिव डा.रोशन पोखरेलले १६ हजार दरबन्दी तत्काल आवश्यक रहेको बताउनुभएको छ । पोखरेलले केन्द्रीय अस्पतलाहरुका लागि तत्काल सो दरबन्दी चाहिएको बताउनुभएको हो ।
मंगलबार संघीय संसद् राष्ट्रिय सभाअन्तर्गतको राष्ट्रिय सरोकार तथा समन्वय समितिको बैठकमा बोल्दै उहाँले अर्थ मन्त्रालयमा सो दरबन्दीका लागि आफूहरूले गरेको प्रस्ताव स्वीकृत नभए ५ सय शय्यामा केन्द्रीय अस्पतालहरू बन्द हुने अवस्था रहेकोसमेत स्पष्ट पार्नुभयो ।
हाल सञ्चालनको क्रममा रहेका ५, १० र १५ बेडको अस्पताल सञ्चालन लागि पनि स्वास्थ्य मन्त्रालयले दरबन्दी थपका लागि पठाएको सो प्रस्ताव अर्थ मन्त्रालयले स्वीकृत गर्नै पर्ने सचिव पोखरेलको भनाइ थियो।
उहाँले सो दरबन्दी स्वीकृतिका लागि अर्थ मन्त्रालयमा पहल गरिदिन पनि समितिका सदस्यहरूसँग आग्रह गर्नुभएको छ । सचिव पोखरेलले चालु आर्थिक वर्षको नीति तथा कार्यक्रममा उल्लेख गरिएको विशेषज्ञसहित पाँचजना चिकित्सक स्थानीय तहमा पठाउने कुरा सम्भव नरहेको पनि बताउनुभयो।
त्यसैगरी अस्पतालहरू बिहान ८ बजेदेखि बेलुका ८ बजेसम्म खोल्ने नीतिमा भनिए पनि कार्यान्वयन गर्न सक्ने अवस्था नरहेको उहाँले बताउनुभयो।
उहाँले भन्नुभयो, ‘केन्द्रीय अस्पतालको दरबन्दी हामीलाई १५ देखि १६ हजार तुरुन्तै चाहिनेछ। यो भएन भने हाम्रा ५ सय बेडका केन्द्रीय अस्पतालहरू हुँदैनन्। र, आगामी दिनमा बन्दै गरेका ५, १० र १५ बेडका अस्पतालको एउटा प्रस्तावित दरबन्दीको आर्थिक पाटोमा नेपाल सरकारले दिएन भने ती अस्पतालहरू चल्दैनन्।’
