बुटवल । भुमि ब्यवस्था,सहकारी तथा गरिबी निवारण मन्त्री बलराम अधिकारीले केही सहकारीले गलत काम गर्दा सबै सहकारी खराब हुन् भन्ने भ्रम पैदा भएको भन्दै देशको अर्थतन्त्रको महत्त्वपूर्ण भुमिका निर्वाह गरेको सहकारी क्षेत्रलाई एउटै डालोमा राखेर तुलना गर्न नहुने बताएका छन् ।
आइतबार बुटवलमा आयाेजित सामाजिक उद्ममी महिला संजाल नेपालकाे लुम्बिनी प्रदेश स्तरीय समन्वयात्मक बैठक तथा अन्तरक्रिया कार्यक्रममा बाेल्दै मन्त्री अधिकारीले उक्त कुरा बताएका हुन् ।
पछिल्लो समय सहकारीलाई हेर्ने दृष्टिकोण नकारात्मक भएको भन्दै उनलेे केही सहकारीहरूकाे गलत क्रियाकलापका कारण समग्र सहकारी क्षेत्रकाे बदनाम गर्न नहुनेमा जाेड दिए ।
देशभर ३१ हजार ४ सय सहकारी दर्ता भएको तथ्यांक रहेको उल्लेख गर्दै मन्त्री अधिकारीले भने -" ३१ हजार ४ सय सहकारीमध्ये २/३ सहकारी खराब होलान तर सबै सहकारी खराब हुन् भन्नु न्यायाेचित नहुने धारणा राखे ।
बिदेशी दातृ निकायले सहयोग गर्दासम्म काम गर्ने र उसले छाेड्दा सबै लथालिङ्ग हुने प्रबृत्ति रहेको भन्दै उनलेे दातृ निकायले सहयोग गर्न छाड्दा पनि साे संयन्त्रले आफ्नो काम निरन्तर गरिरहने खालकाे नीति तथा योजना बनाउनुपर्ने आवश्यकता औल्याए ।
