विराटनगर । कोशी प्रदेशका प्रदेश प्रमुख परशुराम खापुङ समक्ष मुख्य न्यायाधिवक्ताले प्रतिवेदन बुझाएका छन् । विराटनगर स्थित प्रदेश प्रमुखको कार्यालयमा आयोजित कार्यक्रममा मुख्य न्यायाधिवक्ताको सातौं प्रतिवेदन बुझ्दै प्रदेश प्रमुख परशुराम खापुङले संघियता कार्यान्वयनमा प्रदेशका कानुनहरु प्रभावकारी बन्नुपर्ने र कार्यान्वयनमा लैजान सक्नुपर्ने बताउनुभयो ।
उहाँले कानुनी शासन र कानुन कार्यान्वयनमा मुख्य न्यायाधिवक्ताको भूमिका अझै प्रभावकारी बनाउदै लैजान आग्रह गर्नुभयो । उहाँले मुख्य न्यायाधिवक्ता प्रदेश सरकारको कानुनी सल्लाहकार समेत भएकाले प्रदेश सरकारले गरेका कार्यहरुको कानुनी बचाउ गर्ने भूमिका निर्वाह गर्न सक्नुपर्ने धारणा राख्नुभयो ।
मुख्यन्यायाधिवक्ताको काम कर्तव्य, अधिकार र सेवाका अन्य शर्त सम्बन्धि ऐन २०७५ बमोजिम मुख्य न्यायाधिवक्ता नारायण वस्तीले प्रदेश प्रमुख खापुङलाई आर्थिक वर्ष ०८०/८१ को सातौं प्रतिवेदन बुझाउनुभएको थियो । प्रतिवेदन बुझाउदै मुख्यन्यायाधिवक्ता वस्तीले सो कार्यालयको प्रगति समिक्षा प्रस्तुत गर्नुभएको थियो ।
सो कार्यक्रममा प्रदेश प्रमुखको कार्यालयका सचिव सहित कर्मचारीहरु र मुख्य न्यायाधिवक्ताको कार्यालयका कर्मचारीहरुको उपस्थिति रहेको थियो ।
