काठमाडौं । माल्दिभ्समा सोमबारदेखि सुरु भएको साफ यू–२० च्याम्पियनसिपको उद्घाटन खेलमा नेपालले भुटानविरुद्ध २–१ को कठिन जित निकालेको छ ।
सोमबार माल्दिभ्सको राजधानी मालेस्थित राष्ट्रिय फुटबल रंगशालामा नेपाललाई जित दिलाउन सुजन डंगोल र सुवास बमले समान एक गोल गरे । भुटानका एनग्वान योन्टेनले गोल गरे पनि टोलीको हार टार्न सकेनन् ।
पाँचौँ मिनेटमा सुजनले पेनाल्टी बक्सभित्र प्राप्त फ्रिकिक अवसरलाई गोलमा परिणत गर्दै टोलीलाई अग्रता दिलाएका थिए । ५२औँ मिनेटमा सुवासले अग्रतालाई दोब्बर बनाए । ८२औँ मिनेटमा योनटेनले गोल गर्दै भुटानलाई १–२ को स्थितिमा फर्काएका थिए ।
यो जितसँगै समूह ‘ए’मा रहेको नेपालले प्रतियोगितामा सुखद सुरुआत गरेको छ । पराजित भुटानले भने हारसँगै प्रतियोगिताको सुरुआत गरेको छ ।
दक्षिण एसियाली फुटबल महासंघ (साफ) को आयोजनामा माल्दिभ्समा सोमबारदेखि प्रतियोगिता सुरु भएको छ । प्रतियोगितमा साफका सातवटै सदस्य राष्ट्रहरूको सहभागिता रहेको छ ।
सहभागी राष्ट्रलाई दुई समूहमा विभाजन गरिएको छ । ‘लिग कम नकआउट’ प्रणालीमा सञ्चालित यो प्रतियोगितामा प्रत्येक शीर्ष दुई टोली सेमिफाइनलमा स्थान बनाउनेछन् ।
