काठमाडौं l अर्घाखाँचीबाट प्रतिनिधि सभा सदस्य हरि प्रसाद भुसालले लुम्बिनी प्रदेशका सांसदहरूको टोलीसहित सोमबार प्रधानमन्त्री बालेन्द्र शाहसँग भएको भेटमा जिल्लाका प्रमुख र ज्वलन्त समस्याहरू स्पष्ट रूपमा उठाएका छन् ।
सीमित समयमै महत्वपूर्ण मुद्दाहरू प्रस्तुत गरेको उनको पहललाई अर्थपूर्ण रूपमा हेरिएको छ। भेटका क्रममा भुसालले बाँदर र बदेलजस्ता वन्यजन्तुको बढ्दो आतंकका कारण गाउँहरू रित्तिँदै गएको गम्भीर अवस्था औंल्याए ।
उनले यसले कृषि उत्पादनमा नकारात्मक असर पार्दै ग्रामीण जनजीवन संकटमा परेको उल्लेख गर्दै तत्काल समाधानका लागि प्रभावकारी सरकारी कदम आवश्यक रहेको बताए ।
यससँगै, अर्घाखाँचीमा अलपत्र परेका विकास योजनाहरू शीघ्र कार्यान्वयनमा लैजान उनले सरकारको ध्यानाकर्षण गराए । कृषिको व्यवसायीकरण, पर्यटकीय सम्भावनाको उपयोग, गाउँ–गाउँमा देखिएको खानेपानी अभाव, शिक्षा क्षेत्रको सुधार तथा जिल्ला अस्पतालको स्तरवृद्धि जस्ता विषयहरूलाई उनले प्राथमिकताका साथ प्रस्तुत गरे ।
भुसालको यो पहल जनताका वास्तविक समस्या उठाउने जिम्मेवार प्रयासका रूपमा लिइएको छ । सरोकारवाला निकायहरूले उनले उठाएका विषयमा सरकारले चाँडै ठोस निर्णय लिने अपेक्षा व्यक्त गरेका छन् ।
सांसद भुसालले जनअपेक्षाअनुसार सरकारले आवश्यक पहल गर्नेमा आफू आशावादी रहेको बताएका छन् ।
