दाङ l नेपाली कांग्रेसले लुम्बिनी प्रदेशस्तरीय निर्वाचन समीक्षा कार्यक्रम राप्ती उपत्यकाको भालुबाङमा आयोजना गर्दै पछिल्लो निर्वाचनको परिणाम, कमजोरी र आगामी रणनीतिबारे गम्भीर छलफल थालेको छ।
पार्टीका शीर्ष नेतृत्वदेखि प्रदेश र जिल्ला तहका जिम्मेवार नेताहरूको उल्लेखनीय उपस्थितिमा भइरहेको यो समीक्षा कार्यक्रमले कांग्रेसभित्र आत्ममूल्यांकन र संगठन पुनःनिर्माणको संकेत दिएको छ।
कार्यक्रममा पार्टीका सभापति गगनकुमार थापा, उपसभापति विश्वप्रकाश शर्मा, उपसभापति पुष्पा भुसाललगायत केन्द्रीय पदाधिकारी तथा सदस्यहरूको सक्रिय सहभागिता रहेको छ।
साथै, लुम्बिनी प्रदेशका २६ वटा संघीय निर्वाचन क्षेत्रका उम्मेदवार, प्रदेश र जिल्ला तहका नेताहरूको उपस्थिति कार्यक्रमको गम्भीरता र महत्वलाई झल्काउने खालको देखिएको छ।
प्रदेश कार्यसमितिका सभापति अमरसिंह पुनको अध्यक्षतामा सञ्चालन भइरहेको कार्यक्रममा नेतृत्वले संगठनभित्र देखिएका कमजोरीहरूलाई खुलेर समीक्षा गर्ने प्रयास गरेको छ।
समीक्षा क्रममा नेताहरूले फागुन २१ गते सम्पन्न निर्वाचनमा पार्टीले अपेक्षित सफलता हासिल गर्न नसक्नुका कारणहरूबारे खुला रूपमा धारणा राखेका छन्। सहभागीहरूका अनुसार पराजयका कारण केवल बाह्य राजनीतिक समीकरण मात्र नभई आन्तरिक असन्तुलन, समन्वय अभाव र संगठनभित्रको अन्तरघात पनि मुख्य जिम्मेवार रहेको औंल्याइएको छ।
विशेषगरी उम्मेदवारहरूले निर्वाचनका क्रममा पार्टीभित्रैबाट भएको असहयोग र अन्तर्घातले नतिजामा प्रत्यक्ष असर पारेको बताएका छन्। कार्यक्रममा सहभागी अधिकांश नेताहरूले अन्तरघात गर्ने व्यक्तिहरूको पहिचान गरी उनीहरूमाथि कडा कारबाही गर्नुपर्ने माग गरेका छन्।
उनीहरूले संगठनभित्र अनुशासन कायम नगरी आगामी निर्वाचनमा सुधार सम्भव नहुने स्पष्ट पारेका छन्। “पार्टीभित्रको कमजोरीलाई ढाकछोप गर्ने होइन, पहिचान गरेर सुधार गर्नुपर्छ,” भन्ने धारणा बैठकमा बारम्बार उठेको बताइएको छ।
यसैबीच, शीर्ष नेतृत्वले पनि संगठन सुदृढीकरण, आन्तरिक एकता र प्रभावकारी समन्वयलाई प्राथमिकतामा राख्दै अघि बढ्नुपर्नेमा जोड दिएको छ। सभापति गगनकुमार थापाले पार्टीभित्र देखिएका समस्याहरूलाई इमान्दारितापूर्वक स्वीकार गर्दै सुधारको बाटोमा अघि बढ्नुपर्ने संकेत दिएका छन्।
उनले संघीयताको प्रभावकारी कार्यान्वयनका लागि पार्टी संरचना र कार्यशैलीलाई अझ सुदृढ बनाउनु आवश्यक रहेको उल्लेख गरेका छन्। कार्यक्रममा संघीयताको सबल कार्यान्वयनका लागि यस्ता प्रदेशस्तरीय समीक्षा कार्यक्रमलाई नियमित बनाउने पनि उद्घोष गरिएको छ।
नेतृत्वले प्रदेश र केन्द्रबीच समन्वय अभिवृद्धि गर्दै संगठनलाई समयानुकूल रूपान्तरण गर्ने प्रतिबद्धता व्यक्त गरेको छ। भालुबाङमा भइरहेको यो समीक्षा कार्यक्रमले नेपाली कांग्रेसभित्र आत्मसमीक्षा, अनुशासन र सुधारको बहसलाई नयाँ ढंगले अघि बढाएको छ।
अब पार्टीले उठेका प्रश्नहरूको सम्बोधन कसरी गर्छ र अन्तरघातजस्ता गम्भीर विषयमा कस्तो कदम चाल्छ भन्ने विषयले आगामी राजनीतिक दिशा निर्धारण गर्ने देखिन्छ।
