कपिलवस्तु l कपिलवस्तुको शिवराज नगरपालिका-चन्द्रौटास्थित एक सुनचाँदी पसलमा चोरी गरेको आरोपमा दुई पाकिस्तानी महिलालाई प्रहरीले पक्राउ गरेको छ।
मंगलबार साँझ करिब ५:३० बजे सुरेन्द्र सुनचाँदी पसलबाट सुन किन्ने बहानामा गहना चोरी गरेर बाहिरिने क्रममा उनीहरू पक्राउ परेका हुन्। प्रहरीका अनुसार महिलाहरूले गहना हेर्ने बहानामा चोरी गरेको दृश्य पसलको सीसीटीभी फुटेजमा स्पष्ट देखिएको छ।
चोरीपछि उनीहरूले मास्कमाथि बुर्का लगाएर आफ्नो पहिचान लुकाउने प्रयास गरेका थिए। पसल सञ्चालकले गहना हराएको थाहा पाएपछि तत्काल खोजी गर्दा केही पर ती महिला फेला परेपछि प्रहरीलाई खबर गरिएको थियो।
सूचनापछि वडा प्रहरी कार्यालय चन्द्रौटाबाट खटिएको टोलीले उनीहरूलाई नियन्त्रणमा लिएको हो। पक्राउ परेकामध्ये कलसुम र सहबाना नामका महिलाको साथबाट पाकिस्तानको पासपोर्ट समेत बरामद भएको प्रहरीले जनाएको छ।
प्रारम्भिक अनुसन्धानका क्रममा उनीहरूले एकै दिन रूपन्देहीको योगीकुटी, कपिलवस्तुको तौलिहवा र चन्द्रौटामा गरी तीन स्थानमा चोरी गरेको खुलेको छ।
नगद देखाएर वा गहना किन्ने बहानामा पसलमा प्रवेश गरी सुन चोरी गर्ने उनीहरूको शैली रहेको प्रहरीको भनाइ छ। प्रहरीले यो घटनामा संगठित गिरोहको संलग्नता हुन सक्ने आशंका गर्दै थप अनुसन्धान अघि बढाएको छ।
पक्राउ परेका महिलाविरुद्ध चोरी तथा ठगी सम्बन्धी मुद्दामा अनुसन्धान भइरहेको वडा प्रहरी कार्यालय चन्द्रौटाले जनाएको छ।
