अर्घाखाँची । छत्रदेव गाउँपालिकाले कृषि क्षेत्रलाई प्राथमिकतामा राख्दै उदाहरणीय कार्यको थालनी गरेको छ । गाउँपालिकाले परशुरामेश्वर गुठी बल्कोटस्थित करिब २० रोपनी जग्गामा आफ्नै लगानीमा व्यावसायिक खेती सञ्चालन गर्दै आएको हो ।
वडा नं. ४ को सेरिखोलामा अघिल्लो वर्षदेखि सुरु गरिएको यस अभियान अन्तर्गत सिजनअनुसार आलु र धान खेती हुँदै आएको छ । चालु सिजनमा आलु उत्पादन अघिल्लो वर्षको तुलनामा उल्लेखनीय रूपमा वृद्धि भएको गाउँपालिका अध्यक्ष चन्द्रमान श्रेष्ठले जानकारी दिनुभयो । उहाँका अनुसार पालिकाको यो पहलले स्थानीयस्तरमा सकारात्मक सन्देश प्रवाह गरेको छ ।
“पालिकाले सुरु गरेको काम सबैले अनुकरण गर्नुपर्छ,” अध्यक्ष श्रेष्ठले भन्नुभयो । गाउँपालिका उपाध्यक्ष मनि पन्थीले यस कार्यक्रमले स्थानीय किसानहरूलाई कृषि पेशातर्फ आकर्षित गर्न महत्त्वपूर्ण भूमिका खेलेको बताउनुभयो । “पालिकाले आफैं खेती गर्न थालेपछि किसानहरूमा पनि कृषि कार्यप्रति उत्साह बढेको छ,” उहाँले उल्लेख गर्नुभयो ।
प्रमुख प्रशासकीय अधिकृत बासुदेव खनालका अनुसार नेपाल कृषि प्रधान देश भएकाले स्थानीय विकासको आधार कृषि नै हुनसक्छ भन्ने विश्वासका साथ कार्यक्रम अघि बढाइएको हो ।
यस वर्ष आलु खेती अर्गानिक विधिबाट गरिएको छ । स्थानीय मलखादको प्रयोगका कारण उत्पादन राम्रो भएको र माटोको उर्वराशक्ति दीर्घकालीन रूपमा जोगिने अपेक्षा गरिएको उहाँले बताउनुभयो ।
यसैबीच, गाउँपालिकाले सूचीकृत बेरोजगार महिला तथा पुरुषलाई खेती कार्यमा संलग्न गराउँदै रोजगारी सिर्जना गरेको छ । रोजगार संयोजक सन्तोष भुसालका अनुसार आलु खन्ने तथा व्यवस्थापन कार्यमा स्थानीय जनशक्ति प्रयोग गरिएको छ, जसले रोजगारीसँगै सीप विकासमा समेत टेवा पुर्याएको छ । हाल आलु खन्ने कार्य सुरु भइसकेको छ ।
गाउँपालिकाले यस वर्ष करिब ६० क्विन्टल आलु उत्पादन गर्ने लक्ष्य राखेको जनाएको छ । गाउँपालिकाको यस पहलले स्थानीय तहबाटै कृषि क्रान्तिको सन्देश दिएको छ ।
आधुनिक तथा अर्गानिक विधिमा आधारित खेतीले आत्मनिर्भरता मात्र नभई आर्थिक समृद्धितर्फ पनि महत्वपूर्ण योगदान पुर्याउने अपेक्षा गरिएको छ । यसै सन्दर्भमा गाउँपालिकाले उत्पादित आलु बिक्रीका लागि सूचना समेत जारी गरेको छ ।
प्रमुख प्रशासकीय अधिकृत खनालका अनुसार आलुको ग्रेडअनुसार थोक मूल्य प्रतिकिलो रु ३५ र खुद्रा मूल्य रु ५० निर्धारण गरिएको छ ।
