बुटवल l बुटवल उपमहानगरपालिकाले सरकारी जग्गा अतिक्रमण हटाउने अभियानलाई तीव्र बनाउँदै उच्च अदालत तुलसीपुर, बुटवल इजलास अगाडि रहेको बस्ती हटाउने कार्य अघि बढाएको छ । उपमहानगरको सार्वजनिक सूचनापछि स्थानीय बासिन्दाहरूले आइतबार बिहानदेखि नै आफ्ना घर-टहरा स्वयं हटाउन सुरु गरेका छन् । यस कदमले सार्वजनिक सम्पत्तिको संरक्षणमा कडाइ गर्दै अतिक्रमणविरुद्ध स्पष्ट सन्देश दिएको छ ।

उक्त बस्ती बुटवल उपमहानगरपालिका-४ मा पर्ने साविक कित्ता नम्बर ३९६ (हाल ७८१२६११३४०) अन्तर्गत करिब २ बिघा ५ कट्ठा १४ धुर क्षेत्रफलमा फैलिएको थियो । अदालतजस्तो संवेदनशील सरकारी निकायको नजिकै रहेको यस जग्गा लामो समयदेखि अतिक्रमणमा परेको सन्दर्भमा उपमहानगरको पहललाई महत्वपूर्ण कदमका रूपमा हेरिएको छ । बुटवल उपमहानगरपालिका वडा नमबर ४ अध्यक्ष नरिश्वर शर्मा पौडेलका अनुसार शनिबार साँझ माइकिङमार्फत सूचना जारी गरिएपछि केही टहराधनीले स्वेच्छिक रूपमा संरचना हटाउन थालेका हुन् ।

इलाका प्रहरी कार्यालय बुटवलका डिएसपी निशान्त श्रीवास्तवले नापी कार्य सम्पन्न भएपछि आवश्यक परे डोजर प्रयोग गरी बाँकी संरचना हटाइने जानकारी दिनुभयो । सुरक्षाकर्मीको उपस्थितिमा अभियान शान्तिपूर्ण र व्यवस्थित रूपमा सञ्चालन भइरहेको जनाइएको छ । यो अभियान स्थानीय सीमाभन्दा बाहिर पनि अर्थपूर्ण देखिन्छ।

काठमाडौंसहित देशका विभिन्न स्थानमा सरकारी तथा सार्वजनिक जग्गा संरक्षणका प्रयासहरू तीव्र भइरहेका बेला बुटवलको यो कदमले स्थानीय सरकारको सक्रियता र प्रतिबद्धता प्रस्ट पारेको छ । यसले आगामी दिनमा संघ, प्रदेश र स्थानीय तहबीचको समन्वय सुदृढ गर्दै सार्वजनिक सम्पत्तिको दीर्घकालीन संरक्षणमा सकारात्मक प्रभाव पार्ने अपेक्षा गरिएको छ ।