काठमाण्डौ । राष्ट्रिय खेलकुद परिषद् (राखेप) ले अखिल नेपाल फुटबल सङ्घ (एन्फा) माथि लगाएको निलम्बन नि:शर्त फुकुवा गरेको छ। शिक्षा तथा खेलकुदमन्त्री सस्मित पोखरेल, राखेपका सदस्य सचिव रामचरित्र मेहता र एन्फा पदाधिकारीहरूबीच आज भएको बैठकले निलम्बन फिर्ता लिने निर्णय गरेको एन्फाका प्रवक्ता सुरेश शाहले जानकारी दिए। यसअघि परिषद्को स्वीकृति बिना नै निर्वाचन गर्न लागेको भन्दै राखेपले गत चैत १२ गते एन्फालाई तीन महिनाका लागि निलम्बन गरेको थियो। राखेपको उक्त कदमपछि एन्फा नेतृत्वले चैत १३ गतेका लागि तय गरेको आफ्नो चुनावी साधारण सभा स्थगित गरेको थियो।

यसैबीच, नेपाली फुटबलको सर्वोच्च निकायमाथि गरिएको निलम्बन फिर्ता लिन अन्तर्राष्ट्रिय फुटबल महासङ्घ (फिफा) र एशियाली फुटबल महासङ्घ (एएफसी) ले पनि राखेपलाई आग्रह गरेका थिए। दुवै अन्तर्राष्ट्रिय निकायको निरन्तरको चासो र खेलकुद मन्त्रालयसहितको संयुक्त बैठकपछि राखेपले आफ्नो निर्णय फिर्ता लिएको हो। यो फुकुवासँगै अब एन्फालाई आफ्नो नयाँ कार्यसमिति चयनका लागि निर्वाचन गर्ने बाटो खुला भएको छ।