काठमाण्डाै – फिफा विश्वकप फुटबलमा आज राति सहआयोजक क्यानडाले र बोस्निया एन्ड हर्जगोभिनासँग खेल्दैछ । समूह ‘बी’ को यो खेल क्यानडाको टोरन्टो रङ्गशालामा नेपाली समय अनुसार राति पौने १ बजे शुरू हुनेछ ।
प्रतियोगितामा दुवै टोलीको यो पहिलो खेल हो । अन्तर्राष्ट्रिय फुटबल र विश्वकपमा क्यानडा र बोस्नियाको यो पहिलो भेट हुनेछ ।
क्यानडाले लगातार दोस्रो र समग्रमा तेस्रो पटक विश्वकप खेल्न लागेको हो । यसअघि सन् १९८६ र २०२२ को विश्वकपमा सहभागी भएको क्यानडा अहिले आयोजकका रूपमा सीधै छनोट भएको हो । क्यानडाले अहिलेसम्म विश्वकपमा ६ वटा खेल खेल्दा १ खेल पनि जित्न सकेको छैन । दुवै पटक समूह चरणबाटै बाहिरिएको क्यानडाले ६ खेलमा २ गोल गरेको छ ।
यस्तै बोस्निया एन्ड हर्जगोभिनाले दोस्रो पटक विश्वकप खेल्न लागेको हो । यसअघि बोस्नियाले सन् २०१४ मा पहिलो पटक विश्वकप खेलेको थियो । त्यति बेला बोस्नियाले १ खेल जित्दै र २ खेल हार्दै समूह चरणबाटै बाहिरिएको थियो । यस पटक बोस्नियाले चार पटकको विजेता इटालीलाई पेनाल्टी शुटआउटमा हराउँदै विश्वकपमा छनोट भएको हो ।
फिफा विश्वकपमा भोलि बिहान आयोजक अमेरिका र पराग्वे खेल्दैछन् । यो खेल अमेरिकाको लस एन्जलस रङ्गशालामा नेपाली समय अनुसार पौने ७ बजे शुरू हुनेछ ।
