गुल्मी । वर्षासँगै विभिन्न स्थानमा पहिरो खसेर अवरुद्ध बनेको कालीगण्डकी करिडोर सञ्चालनमा आएको छ। करिडोरअन्तर्गत हर्मिचौर–अर्वेनी–पुर्तिघाट खण्डमा खसेको पहिरो हटाएपछि बुधबार बेलुकादेखि सडकमा यातायात सञ्चालनमा आएको हो।
कालीगण्डकी करिडोरको उक्त खण्डका विभिन्न स्थानमा लेदोसहित ठूला ढुङ्गा खसेपछि सडक अवरुद्ध भएको थियो। सडक अवरुद्ध हुँदा तम्घास, बागलुङ, पाल्पा, बुटवल तथा पोखरातर्फ आवतजावत गर्ने यात्रु तथा सवारीसाधन प्रभावित भएका थिए।
कालीगण्डकी गाउँपालिका र सडक डिभिजन कार्यालय पाल्पाको समन्वयमा डोजर तथा एक्साभेटर प्रयोग गरी सडकमा थुप्रिएको पहिरो हटाएपछि यातायात सञ्चालनमा ल्याइएको जिल्ला प्रहरी कार्यालयका सूचना अधिकारी वीरेन्द्रवीर विश्वकर्माले जानकारी दिए।
कालीगण्डकी गाउँपालिकाका अध्यक्ष वेदबहादुर थापाका अनुसार सत्यवती गाउँपालिकाको रुद्रवेणीदेखि कालीगण्डकीको हर्मिचौर, अर्वेनी हुँदै पुर्तिघाटसम्मका विभिन्न स्थानमा पहिरो खसेको थियो। पहिरो हटाएपछि गाउँपालिकाभित्र अवरुद्ध भएका शाखा सडकसमेत सञ्चालनमा आएका छन्।
सडक अवरुद्ध भएपछि बीच बाटोमै रोकिएका सार्वजनिक तथा अन्य सवारीसाधन अहिले गन्तव्यतर्फ जान थालेका छन्। सडक सञ्चालनमा आएपछि यस क्षेत्र हुँदै यात्रा गर्ने सर्वसाधारणलाई आवतजावतमा सहज भएको छ।
वर्षाका कारण पहिरो खस्ने क्रम अझै जोखिमपूर्ण रहेकाले सडक प्रयोग गर्ने यात्रुलाई आवश्यक सावधानी अपनाउन स्थानीय प्रशासन तथा सम्बन्धित निकायले आग्रह गरेका छन्।
