बाँके । करिब एक वर्षदेखि रोकिएको आमा सुरक्षा तथा नवजात शिशु कार्यक्रम कोहलपुरस्थित नेपालगन्ज मेडिकल कलेज शिक्षण अस्पतालमा पुनः सञ्चालनमा आएको छ । कार्यक्रम पुनः सुरु भएसँगै कोहलपुर र आसपासका आर्थिक रूपमा विपन्न गर्भवती तथा नवजात शिशुले प्रसूति र उपचार सेवामा सहज पहुँच पाउने भएका छन् ।
कोहलपुर नगरपालिका र नेपालगन्ज मेडिकल कलेज शिक्षण अस्पतालबीच कार्यक्रम सञ्चालनसम्बन्धी सम्झौता भएपछि सेवा पुनः सुरु गरिएको हो । यसपटक आमा सुरक्षा कार्यक्रमसँगै नवजात शिशु सुरक्षा कार्यक्रमसमेत समेटिएको कोहलपुर नगरपालिकाकी उपप्रमुख सङ्गीता सुवेदीले जानकारी दिइन् ।
यसअघि नवजात शिशु सुरक्षा कार्यक्रमसमेत समेट्न नगरपालिकाले आग्रह गरे पनि सहमति हुन नसक्दा गत वर्ष अस्पतालमा आमा सुरक्षा कार्यक्रम नै बन्द भएको थियो । कार्यक्रम बन्द हुँदा कोहलपुर तथा आसपासका क्षेत्रका सयौँ महिला र नवजात शिशुले उपचार सेवामा समस्या भोग्नुपरेको नगरपालिकाले जनाएको छ ।
कार्यक्रम पुनः सञ्चालनमा आएपछि आर्थिक अभावका कारण गर्भवती तथा सुत्केरीले आवश्यक स्वास्थ्य सेवा नपाउने अवस्था कम हुने नगर उपप्रमुख सुवेदीले बताइन् । विशेषगरी विपन्न परिवारका महिला र नवजात शिशुका लागि कार्यक्रमले राहत पुग्ने उनको भनाइ छ ।
कोहलपुर नगरपालिकाका प्रमुख प्रशासकीय अधिकृत मानबहादुर गिरीका अनुसार नेपाल सरकारको निर्धारित मापदण्डअनुसार नेपालगन्ज मेडिकल कलेजसँग सम्झौता गरी कार्यक्रम सञ्चालनमा ल्याइएको हो ।
नेपालगन्ज मेडिकल कलेजका निर्देशक प्रा. डा. रेशमबहादुर रानाले सम्झौता कोहलपुर नगरपालिकासँग भए पनि कार्यक्रमअन्तर्गत देशभरबाट आउने गर्भवती तथा नवजात शिशुले सेवा लिन सक्ने बताए । नवजात शिशुलाई आवश्यक उपचार तथा सुविधा उपलब्ध गराउन अस्पतालले व्यवस्थापन गरेकाले यसपटक नवजात शिशु उपचार सेवासमेत कार्यक्रमअन्तर्गत समेटिएको उनले जानकारी दिए ।
कार्यक्रम सञ्चालनसम्बन्धी सम्झौतामा कोहलपुर नगरपालिकाका प्रमुख प्रशासकीय अधिकृत गिरी र नेपालगन्ज मेडिकल कलेजका निर्देशक प्रा. डा. रानाले हस्ताक्षर गरेका छन् ।
