दाङ। लुम्बिनी प्रदेश सरकार आन्तरिक मामिला,कानून तथा सहकारी मन्त्रालयका मन्त्री सन्तोष कुमार पाण्डेले पत्रकारले समाजमा भएका सत्यतथ्य घटनालाई बाहिर ल्याउनु पर्नेमा जोड दिए । लुम्बिनी प्रदेशको स्थायी राजधानी भालुवाङमा मंगलबार अनलाइन मिडिया सम्पादन अभिवृद्धि प्रशिक्षणको उद्घाटन गर्दै मन्त्री पाण्डेले पत्रकारहरु निष्पक्ष भएर पत्रकारिता गरी आम नागरिकहरुको विश्वास जित्नुपर्ने बताए ।
मिडियाले सरकारले गरेको राम्रो कामको प्रचार-प्रसार र नराम्रो काम बाहिर ल्याउन भूमिका खेल्नुपर्ने बताउँदै मन्त्री पाण्डेले पत्रकारले खोजमूलक पत्रकारिता गर्नुपर्नेमा जोड दिए ।उनले लुम्बिनी प्रदेश पर्यटन क्षेत्रको हिसाबले महत्वपूर्ण रहेको उल्लेख गर्दै बुद्ध जन्मेको पवित्र भुमिलाई मिडियाको माध्यमबाट प्रचार प्रसारमा लाग्न आग्रह गरे ।
मन्त्री पाण्डेले सञ्चार क्षेत्रको लागि छुट्याइएको बजेट कटौति गर्न नहुने बताउँदै सञ्चार क्षेत्रको लागि आफूले सक्दो सहयोग गर्ने बताए ।
