बुटवल । लुम्बिनी प्रदेशले आर्थिक बर्ष २०८०/८१ को नीति तथा कार्यक्रम प्रस्तुत गरेको छ । शुक्रबार प्रदेशसभाको बैठकमा प्रदेश प्रमुख अमिक शेरचनले प्रदेशको नीति तथा कार्यक्रम प्रस्तुत गरेका हुन् । प्रदेश सरकारले कृषि, शिक्षा, स्वास्थ्य, रोजगारी लगायतलार्ई प्राथमितामा राख्दै नीति तथा कार्यक्रम सार्वजनिक गरेको छ ।
शैक्षिक क्षेत्रको बिकासका लागि प्रदेश सरकारले बिभिन्न नीति प्रस्तुत गरेको छ । प्राविधिक तथा व्यावसायिक शिक्षामा रुपान्तरण गरी शैक्षिक क्षमता सबलीकरण गर्न प्रदेशभर “सिकाउने, टिकाउने र श्रम बजारमा बिकाउने” अभियान संचालन गरिने भएको छ ।
प्रदेश गौरवको आयोजनाको रुपमा स्थापना भएको लुम्बिनी प्राविधिक विश्वविद्यालयमा आगामी शैक्षिक शत्रदेखि सूचना प्रविधि तथा सिभिल इन्जिनियरिङ विषयको अध्यापन सुरु गर्ने र एग्री इन्जिनियरिङ लगायतका विषयको अध्यापन तयारी सुरु गर्ने प्रदेश सरकारको नीति रहेको छ ।
“उत्कृष्ट शिक्षालयलाई सम्मान स् कमजोरलाई प्रोत्साहन” अभियान सहित अत्यधिक विद्यार्थी संख्या भएका विद्यालयमा मापदण्डका आधारमा प्रदेश प्रमुख शैक्षिक विकास कार्यक्रम सञ्चालन गरिने तथा विद्यालय बाहिर रहेका बालबालिकाको गुणस्तरीय शिक्षामा समतामूलक पहुँचको सुनिश्चितताको लागि विद्यालयको पूर्वाधार विकास र सूचना प्रविधिमूलक शिक्षण विधिबाट शिक्षकको पेशागत दक्षता अभिवृद्धि गरिने प्रदेश प्रमुख अमिक शेरचनले बताए ।
“बालश्रम शोषण अन्त्य गर्न र बालबालिकाको संरक्षण र विकासका लागि बाल सुधार गृह संचालनमा सहजीकरण गरिनेछ।” शेरचनले भने “गुरुकुल, मदरसा लगायतका धार्मिक विद्यालय तथा अपाङ्गता भएका बालबालिकाले अध्ययन गर्ने विद्यालयमा दिंदै आएको सहयोगलाई निरन्तरता दिइनेछ।”
सरकारले पुराना कार्यक्रमहरूलाइ पनि निरन्तरता दिएको छ । छात्रबृत्ति, पूर्वाधार निर्माण पुस्तकालय, विज्ञान प्रयोगशालामा उपकरण सहयोग कार्यक्रमलाई निरन्तरता दिएको छ ।
