काठमाण्डौँ । मंगलबारबाट हङकङमा शुरू भएको एसीसी वुमन्स इमर्जिङ टिम्स एसिया कप टी २० क्रिकेट प्रतियोगितामा नेपाल पाकिस्तानको सामना गरिरहेको छ। पाकिस्तान ‘ए’विरुद्ध टस जितेर पहिले बलिङ गरेको नेपालले राम्रो बलिङ गरेपनि वर्षाका कारण खेल रोकिएको छ।
१५ ओभरको समाप्तीमा नेपालले पाकिस्तानको ७ विकेट लिएको छ। पाकिस्तान ६५ रन बनाएर खेलिरहेको छ। पाकिस्तानी ब्याटरविरुद्ध सुरुवातबाटै राम्रो बलिङ गरेको नेपालका लागि कविता जोशी र सीता रानामगरले समान २–२ विकेट लिदाँ इन्दु बर्माले १ विकेट लिएकी थिइन्।
पाकिस्तानका लागि ओपनर शवाल जुलफिकरले २८ रन बनाउनु बाहेक अन्य ब्याटरले भने गतिलो प्रदर्शन गर्न सकेका छैनन्। सदाफ खानको १२ र गुल फेरोजाको ११ रन थप दोहोरो स्कोरका रुपमा रहेको छ। तुवा हसन शून्य तथा कप्तान फतिमा सना ३ रनमा अविजित रहँदा वर्षा शुरू भएपछि खेल स्थगित हुन पुगेको हो।
नेपाल पाकिस्तानलाई पराजित गर्दै सुखद सुरुवातको प्रतिक्षामा रहेको छ। प्रतियोगितामा नेपाल थाइल्यान्डले सहभागिता नजाउने भएपछि अवसर पाएर हङकङ पुगेको थियो। थाईल्यान्डले भिसा समस्याका कारण अन्तिम समयमा नाम फिर्ता लिँदा नेपालले अवसर पाएको हो। यो प्रतियोगितामा नेपालको पहिलो सहभागिता हो।
प्रतियोगितामा नेपाललले आफ्नो समूहमा हङकङ, भारत र पाकिस्तानका सामना गर्नेछ। दोस्रो खेलमा नेपालले १५ जुनमा भारतसँग खेल्दा १७ जुनमा घरेलु टोली हङकङको सामना गर्नेछ। प्रतियोगिताको अर्को समूहमा मलेसिया, युएई, बंगलोदश र श्रीलंका ‘ए’ रहेका छन्। प्रतियोगिता दुबै समूहबाट शीर्ष दुई–दुई टिमले सेमिफाइनलमा स्थान बनाउने छन्।
